გივი ჩუბინიძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი 1953 წელს; საქართველოს მეცნიერებისა და ტექნიკის სახელმწიფო კომიტეტის სახალხო მეურნეობის მართვის ინსტიტუტი და მოსკოვის საინჟინრო-ეკონომიკურ ინსტიტუტთან არსებული უმაღლესი კვალიფიკაციის სპეციალისტთა და ხელმძღვანელ მუშაკთა კურსები.

მუშაობდა საპროექტო ინსტიტუტ "საქსახპროექტის" ინჟინერ-კონსტრუქტორად, საქართველოს მეცნიერებათა აკადემიის სამშენებლო საქმის ინსტიტუტში მეცნიერ თანამშრომლად, ექსპერიმენტული დაპროექტების განყოფილების უფროს ინჟინრად; იყო საქართველოს მშენებლობის სამინისტროს სამშენებლო გაერთიანება "მთავართბილმშენის" N2 სამშენებლო სამმართველოს უფროსი, საქართველოს რესპუბლიკური სამშენებლო გაერთიანება "საქმთავარკოლმშენის" თავმჯდომარის პირველი მოადგილე, საქართველოს სამშენებლო გაერთიანება "საქაგრომშენის" თავმჯდომარის მოადგილე, სახელმწიფო კონცერნ "საქსოფლმშენის" ვიცე-პრეზიდენტი, გაერთიანება "ინტერდიზაინმშენის" გენერალური დირექტორი; მისი ხელმძღვანელობითა და მონაწილეობით აშენდა: თბილისში ვაკის პარკის საცურაო აუზი, ქართული ენციკლოპედიისსამეცნიერო რედაქციის შენობა, საცხოვრებელი სახლი ჭავჭავაძის გამზირზე; ახალგაზრდული ქალაქი "ბორის ძნელაძე" (შავნაბადაზე), ახალი სოფლები და დასახლებები მაღალმთიანი რეგიონებიდან გადმოსახლებულთათვის (ბოლნისის, დმანისის, გარდაბნის რაიონებში), ილიას მემორიალი (ყვარელში), კულტურულ-ზოგადსაგანმანათლებლო და საწარმოო დანიშნულების შენობები, სამშენებლო საწარმოები, პემზის კარიერები, რკინაბეტონის პოლიგონები, განაშენიანდა დაბა წყნეთის სააგარაკო ზონა, ჩატარდა საცხოვრებელი სახლებისა და სხვა ნაგებობების აღდგენითი სამუშაოები (საჩხერის რაიონში) და ა.შ.; იყო 6 სამეცნიერო  ნაშრომისა და გამოგონების, 2 რაციონალური წინადადების ავტორი.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.649

• საზოგადოება "თბილისელი", წევრი

• წითელი დროშის ორდენი
• საპატიო ნიშნის ორდენი
• შრომის ვეტერანი
• საქართველოს დამსახურებული ინჟინერი

• ვაჭრობისა და მრეწველობის ეკონომიური ურთიერთობის საკითხისათვის (ავტორი). - თბილისი, საბჭ. საქართველო, 1970. - 153გვ.
• საზოგადოებრივ საწყისებზე მუშაობის ორგანიზაციული ფორმები და მეთოდები (თანაავტორი). - თბილისი, საბჭოთა საქართველო, 1967. - 128გვ.