შალვა ცაგარეიშვილი

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სატრანსპორტო ფაკულტეტის ხიდებისა და გვირაბების მშენებლობის სპეციალობით 1962 წელს; ამავე ინსტიტუტის ასპირანტურა 1968 წელს; სსრკ მინისტრთა საბჭოსთან არსებული უმაღლესი ეკონომიკური კურსები 1972 წელს; სსკპ ცენტრალურ კომიტეტთან არსებული მოსკოვის უმაღლესი პარტიული სკოლა 1978 წელს.

1971-1974წწ. ინსტიტუტის დამთავრების შემდეგ მუშაობდა საპროექტო და სამეცნიერო-კვლევით ორგანიზაციებში, საქართველოს მინისტრთა საბჭოს სახელმწიფო საგეგმო კომიტეტის კაპდაბანდებათა ნაკრები განყოფილების უფროსის მოადგილედ; 1974-1976წწ. იყო საქართველოს კპ ცენტრალური კომიტეტის მრეწველობისა და ორგანიზაციულ-პარტიული განყოფილებების ინსტრუქტორი; 1976-1978წწ. საქართველოს კპ სამტრედიის რაიკომის პირველი მდივანი; 1978-1991წწ. მუშაობდა საქართველოს კპ ცენტრალურ კომიტეტთან არსებული პარტიული კონტროლის კომისიის თავმჯდომარის მოადგილედ; 1993-1994წწ. საქართველოს თავდაცვის სამინისტროს სასაზღვრო ჯარების სამხედრო საბჭოს მდივნად და აპარატის უფროსად; 1994-1996წწ. იყო საპროექტო ინსტიტუტ "თბილსახავტოგაზპროექტის" (ყოფილი "სოიუზდორპროექტის" თბილისის ფილიალის) დირექტორი; 1997 წლიდან საქართველოს უმაღლესი მთავარსარდლის მთავარი სამხედრო ინსპექციის სამხედრო ინსპექტორია, აქვს პოლკოვნიკის წოდება; მონაწილეობდა ავღანეთის რესპუბლიკაში ავტოსაგზაო ხიდებისა და ნაგებობების პროექტირებაში, ტექტოგულის ჰიდროელექტროსადგურის (ყირგიზეთი), საავტომობილო გზით შემოვლის ტექნიკურ-ეკონომიკურ დასაბუთებაში; იყო საქართველოს კომპარტიის რამდენიმე ყრილობის დელეგატი, საქართველოს კპ ცენტრალური კომიტეტის აპარატის პარტიული კომიტეტის წევრი. მიღებული აქვს საქართველოს უმაღლესი საბჭოს პრეზიდიუმის სამკერდე ნიშანი, საქართველოს უმაღლესი საბჭოს პრეზიდიუმის საპატიო სიგელი.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.659-660

• საპატიო ნიშნის ორდენი