გიორგი ცობეხია

დაბადების ადგილი: სოფელი ქვემო ბარღები, გალის რაიონი.

დაამთავრა მოსკოვის საინჟინრო-სამშენებლო ინსტიტუტის სამრეწველო და სამოქალაქო მშენებლობის ფაკულტეტი 1953 წელს.

შრომითი საქმიანობა დაიწყო საქართველოს მშენებლობის სამინისტროს N6 სამშენებლო ტრესტის N1 სამშენებლო სამმართველოში; გაიარა სამშენებლო წარმოების ყველა სამსახურებრივი საფეხური: იყო სამუშაოთა მწარმოებელი, კაპმშენებლობის განყოფილების ინჟინერი, ხელმძღვანელობდა რესპუბლიკური მნიშვნელობის ობიექტების მშენებლობას; 1962-1963წწ. მუშაობდა საქართველოს კპ სოხუმის საქალაქო კომიტეტის მრეწველობისა და ტრანსპორტის განყოფილების უფროსად; 1963-1974წწ. სოხუმის ფიზიკა-ტექნიკური ინსტიტუტის დირექტორის მოადგილედ; 1974-1978წწ. იყო აფხაზეთის ასსრ მინისტრთა საბჭოს სახელმწიფო საგეგმო კომიტეტის თავმჯდომარე; 1978-1986წწ. აფხაზეთის ასსრ მინისტრთა საბჭოს თავმჯდომარის მოადგილე; აფხაზეთის პროფსაბჭოს თავმჯდომარე; ხელმძღვანელობდა სოხუმის ფიზიკა-ტექნიკური ინსტიტუტის მატერიალურ-სამშენებლო ბაზის შექმნას, სამრეწველო ობიექტების, ლაბორატორიებისა და საცხოვრებელი სახლების, ასევე, სოხუმის სტადიონის, მთავრობის სახლის, სამრეწველო, სასოფლო-სამეურნეო და სოციალური დანიშნულების მნიშვნელოვანი ობიექტების მშენებლობას; აქტიურად მონაწილეობდა აფხაზეთის ავტონომიური რესპუბლიკის სახალხო მეურნეობის ეკონომიკურ დაგეგმარებასა და განვითარებაში; დიდი წვლილი აქვს შეტანილი "აფხაზეთის ავტონომიური რესპუბლიკის სახალხო მეურნეობის განვითარების შესახებ" საბჭოთა კავშირის მინისტრთა საბჭოს დადგენილების რეალიზაციის საქმეში. იყო აფხაზეთის უმაღლესი საბჭოს ოთხი მოწვევის დეპუტატი.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.674

• მედალი "შრომითი წარჩინებისთვის"
• შრომის წითელი დროშის ორდენი
• აფხაზეთის დამსახურებული ინჟინერი
• საქართველოს დამსახურებული მშენებელი