გიორგი წერეთელი

დაბადების ადგილი: სოფელი ჯვარისა, ამბროლაურის რაიონი.

დაამთავრა საქართველოს პოლიტექნიკური ინსტიტუტის სატრანსპორტო ფაკულტეტი გზების მშენებლობის სპეციალობით 1968 წელს.

1964-1976წწ. მუშაობდა საქართველოს მინისტრთა საბჭოსთან არსებული გზატკეცილების მთავარი სამმართველოს სისტემაში მშენებელ ოსტატად, სამუშაოთა მწარმოებლად; 1976-1987წწ. საქართველოს საავტომობილო გზების სამინისტროს N3 საგზაო-საექსპლუატაციო სამმართველოს მთავარ ინჟინრად; 1989-1993წწ. საწარმოო გაერთიანება "თბილავტოგზაში" კაპიტალური მშენებლობისა და საიჯარო სამუშაოების განყოფილების უფროსად, გაერთიანების მთავარ ინჟინრად; კონცერნ "საქავტოგზის" მაგისტრალური გზების სამმართველოს უფროსად; 1993-2003წწ. კონცერნის რეორგანიზაციის შემდეგ იყო საავტომობილო გზების დეპარტამენტის სახელმწიფო გზების ექსპლუატაციის სამმართველოს უფროსი; 2003 წლიდან არის საქართველოს საავტომობილო გზების დეპარტამენტის თავმჯდომარის მოადგილე; ხელმძღვანელობს საავტომობილო გზების დეპარტამენტის ტექნიკურ საბჭოს, კურირებს მსოფლიო ბანკის კრედიტით დაფინანსებულ შიდასახელმწიფოებრივი და ადგილობრივი მნიშვნელობის გზების სარეაბილიტაციო სამუშაოებს; მისი მონაწილეობითა და ხელმძღვანელობით აშენდა და რეკონსტრუირებულ იქნა რამდენიმე ასეული კილომეტრი საავტომობილო გზების მონაკვეთი; მათ შორის საავტომობილო გზების "თბილისი-სენაკი-ლესელიძის", "თბილისი-საგარეჯო-ლაგოდეხის", "სამტრედია-საჯავახო-გრიგოლეთი", "საჯავახო-ჩოხატაური-ოზურგეთის", "თბილისი-თიანეთის", "თბილისი-წალკა-ნინოწმინდის" მონაკვეთები, ფოთის (მდ. კაპარჭინაზე), თიანეთის (მდ. იორსა და ქუსნოზე), პატარძეულის, საგარეჯოს, გომბორის, ქსნის სახიდე გადასასვლელები; საქართველოს სამეცნიერო და საინჟინრო საზოგადოებათა კავშირმა დაასახელა "წლის საუკეთესო ინჟინრად" 2004 წელს. 

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.684

• ღირსების მედალი
• ღირსების ორდენი (2 ორდენი)