გიგლა ჭანუყვაძე

დაამთავრა საქართველოს პოლიტექნიკური ინსტიტუტის (ამჟამად საქართველოს ტექნიკური უნივერსიტეტი) სამშენებლო ფაკულტეტი სამრეწველო და სამოქალაქო მშენებლობის სპეციალობით (კონსტრუქტორ-სეისმოლოგი) 1958 წელს.

1958-1964წწ. მუშაობდა საპროექტო ინსტიტუტ "საქქალაქმშენპროექტში" ინჟინერ-კონსტრუქტორად, პროექტის მთავარ კონსტრუქტორად; 1964-1997წწ. იყო თბილისის ზონალური ს/კ, ტიპური და ექსპერიმენტული პროექტირების ინსტიტუტის ("თბილზნიიეპი"), სეისმომედეგი მშენებლობის ლაბორატორიის გამგე; 1992-2005წწ. სამეცნიერო-საპროექტო, სამშენებლო საწარმო ფირმა "სახლის" გენერალური დირექტორი იყო; 2005-2009წწ. საქართველოს საგარეო საქმეთა სამინისტრო მშენებლობისა და ქონების მართვის სამმართველოს მთავარი სპეციალისტი; 2009 წლიდან კულტურული მემკვიდრეობის დაცვის ეროვნული სააგენტო, ხარისხის კონტროლისა და ტექნიკური ზედამხედველობის მიმართულების მთავარი კოორდინატორია; 50-ზე მეტი ნაშრომი აქვს გამოყენებული შენობათა სეისმომედეგობასა და მიწისძვრისაგან დაზარალებული ნაგებობების რეაბილიტაციაზე, მათ შორის 11 გამოგონება, რეგისტრირებული სსრკ გამოგონებებისა და აღმოჩენების სახელმწიფო კომიტეტის მიერ; მონაწილეობდა სეისმომედეგი მშენებლობის პროექტებში: 1978-1986წწ. იყო აშშ-სსრკ ერთობლივი პროგრამის "სამოქალაქო ნაგებობების სეისმომედეგი მშენებლობა" კოორდინატორი; 1991 წელს რაჭა-იმერეთში, 1989 წელს სპიტაკში (სომხეთი) და 1985 წელს ბუქარესტში (რუმინეთი) დამანგრეველი მიწისძვრების შედეგად დაზიანებული შენობების რეაბილიტაციის საპროექტო სამუშაოებში; ჩატარებული აქვს კონსერვაცია-რეკონსტრუქციის საპროექტო სამუშაოები (განხორციელებული პროექტები): გელათის სამონასტრო კომპლექსი (მე 11 ს.), არქეოლოგიური მარნის დამცავი პავილიონის პროექტი (2016), ებრაელთა ისტორიულ-ეთნოგრაფიული მუზეუმის (ებრაელთა ყოფილი სინაგოგა), 2014 წელი, რესტავრაციის პროექტი და აღდგენით სამუშაოებზე საავტორო ზედამხედველობა, 2012- შატილის ციტადელის (მე-16ს.) კოშკების რეაბილიტაცია, 2011 - ატენის სიონის (მე-7ს.) რეაბილიტაციის პროექტი, 2010 - ჯვრის მონასტრის მცირე ეკლესიის (მე-6ს.) რეკონსტრუქცია, 2008 - ალავერდის წმ. გიორგის კათედრალის (მე-11ს.) რეკონსტრუქცია-გამაგრების სამუშაოები, 2008 - გელათის სამონასტრო კომპლექსი (მე-11ს.) აკადემიის შენობის გადახურვის აღდგენა, 2001 - დავით გარეჯის სამონასტრო კომპლექსი (მე-6ს.): სატრაპეზოს და ბერების სენაკების რეკონსტრუქცია და გამაგრება, 1999 - თიღვის ეკლესიის (მე-11ს. სამაჩაბლო) რეაბილიტაცია, 1998 - იკორთის ეკლესიის (მე-11ს. სამაჩაბლო) რეაბილიტაცია, 2012 - კვიპროსოს ქართული სამონასტრო კომპლექსის ნაშთების დამცავი პავილიონის პროექტი (არქ. თენგიზ გაბუნია), 2003 - რუსთავის ღვთისმშობლის მიზინების ტაძარი (არქიტექტორთა ჯგუფი დეკანოზ ბესარიონ მენაბდის ხელმძღვანელობით); პროექტი დაჯილდოვდა ოქროს მედლით 2012 წლის სოფიის არქიტექტურულ კვირეულზე ტრადიციული მშენებლობის ნომინაციაში. მიღებული აქვს სსრკ მინისტრთა საბჭოს პრემია 1982 წელს.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.694