ნადეჟდა ხმელნიცკაია-ქურდიანი

დაბადების ადგილი: სანკტ-პეტერბურგი.

დაამთავრა ხარკოვის სახელმწიფო სამრეწველო მშენებლობის ინსტიტუტის არქიტექტურის ფაკულტეტი 1933 წელს.; გაიარა ლენინგრადში არქიტექტორთა კვალიფიკაციის ამაღლების კურსები 1939 წელს.

1930-1933წწ. მუშაობდა ხარკოვის საპროექტო ინსტიტუტ "გიპროგრადში", სადაც ღებულობდა მონაწილეობას თბილისის და უკრაინის რიგი ქალაქების დამუშავებაში; 1934-1935წწ. ლენინგრადსა და მოსკოვში ეწეოდა მოღვაწეობას ქალაქგეგმარების განხრით; 1936 წლიდან მუშაობდა თბილისის სხვადასხვა საპროექტო ორგანიზაციებში: "საქკვებმრეწვპროექტი" (1936-1941), "საქსახპროექტი" (1948-1950) და "საქსოფლპროექტი" (1950-1978); ეწეოდა ნაყოფიერ შემოქმედებით მოღვაწეობას, როგორც მოცულობით პროექტირებაში, ასევე ქალაქგეგმარების განხრით; 1942-1948წწ. მუშაობდა საქართველოს კინოსტუდიაში და როგორც მხატვარი მონაწილეობდა რამდენიმე ფილმის გადაღებაში; ის მიეკუთვნება საქართველოს არქიტექტორთა კავშირის პირველ არქიტექტორ-ქალ წევრთა რიცხვს; მისი ძირითადი ნამუშევრებია: თბილისის კულტურისა და დასვენების პარკი მთაწმინდის პლატოზე (1936-1938); ზ. ქურდიანთან და არქიტექტორ-დენდროლოგ ნ. ციციშვილთან ერთად, ასევე მთაწმინდის პარკის მთავარი შენობა (1938 წ. ზ. ქურდიანთან ერთად ა. ვოლობუევის მონაწილეობით); ზუგდიდის, ოზურგეთის, ხონის და სხვა ჩაის ფაბრიკების სამრეწველო მოედნების და დასახლებების დაგეგმარება (1936-1941); რუსთავის პირველი გენერალური გეგმა (1943-1944 ზ. ქურდიანთან ერთად); გორში სტალინის ძეგლის კვარცხლბეკი (1950, ზ. ქურდიანთან ერთად) და სხვა; მისი მოღვაწეობა განსაკუთრებით ნაყოფიერი იყო საპროექტო ინსტიტუტ "საქსახსოფლპროექტში", სადაც 28 წლის განმავლობაში მისი ავტორობითა და მონაწილეობით დამუშავდა საქართველოში სხვადასხვა სასოფლო-სამეურნეო დანიშნულების 200-მდე პროექტი, რომელთა შორის განსაკუთრებით აღსანიშნავია საუკეთესოდ აღიარებული ხეთის, ლაითურის, გალის ინგირის, ნაფარეულის საბჭოთა და ბებნისის სახელმწიფო სანერგე მეურნეობის დაგეგმარების პროექტები; იყო მრავალი პროფესიული ხასიათის ნაშრომის ავტორი.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.722-723

• 1967 - საქართველოს დამსახურებული არქიტექტორი