აბრამიძისა

აბრამიძისა (აბრამოვისა) - XIX ს. მსახიობი და პირველი მომღერალი ქალი. გიორგი ერისთავის მიერ 1850 წელს განახლებული ქართული თეატრის დრამატული დასის წევრი 1855 წლამდე. ქალ-მსახიობთა შორის გამოირჩეოდა სამსახიობო ნიჭით და სიმღერის უნარით. რეცენზენტ-მწერლის, ივანე ევლახიშვილის სიტყვით: "დაიმსახურა მოწონება ქალბატონ აბრამიძის გაბედულმა და ნიჭიერმა თამაშმა: მისი მოძრაობა, მისი წივილა-გაბმული ხმა და გაბღენძვა სისწორით გადმოგვცემს მიკირტუმ გასპარიჩის ცოლის, თათელას ტიპს." სცენაზე უმთავრესად ივანე კერესელიძის ხელმძღვანელობა-რეჟისორობის დროს მონაწილეობდა. 

წყარო: ქართველ მოღვაწეთა ლექსიკონი:1801-1952: ტ.I .-თბ.,2018.-გვ.56