შურა ჯანელიძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტი არქიტექტურის სპეციალობით 1950 წელს; მოსკოვის არქიტექტურის ინსტიტუტის ასპირანტურა.

ასპირანტურის დამთავრების შემდეგ მუშაობდა მოსკოვის ერთ-ერთი საპროექტო ინსტიტუტში, სადაც განვლო გზა რიგითი არქიტექტორიდან ინსტიტუტის მთავარ არქიტექტორამდე; 1964 წელს დაბრუნდა თბილისში და მუშაობა დაიწყო თბილისის ზონალურ ს/კ, ტიპური და ექსპერიმენტული პროექტირების ინსტიტუტში ("თბილზნიიეპი") სასოფლო მშენებლობის განყოფილების გამგედ, რომელსაც 1971 წლამდე ხელმძღვანელობდა; 1971 წლიდან სათავეში ჩაუდგა იმავე ინსტიტუტის ტექნიკურ განყოფილებას; 1979 წლიდან მუშაობდა საპროექტო ინსტიტუტ "კურორტპროექტის" მთავარ არქიტექტორად; 40 წელი ემსახურა ქართულ არქიტექტურას და ამ ხნის განმავლობაში მისი მოღვაწეობა უშუალოდ დაკავშირებული იყო საქართველოს ახალი და არსებული სოფლების არქიტექტურული დაგეგმარების და კეთილმოწყობის პრობლემატურ საკითხებთან; მის პროფესიონალიზმსა და დიდ შრომისუნარიანობაზე მეტყველებს საქართველოსა და მის საზღვრებს გარეთ მისი ავტორობით შესრულებული პროექტების ვრცელი ნუსხა; პრაქტიკულ პროფესიულ საქმიანობას წარმატებით უთავსებდა პედაგოგიურ მოღვაწეობას საქართველოს პოლიტექნიკური ინსტიტუტისა და ივანე ჯავახიშვილის სახელობის თბილისის სახელმწიფო უნივერსიტეტში.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.740