გივი ჯაფარიძე

დაბადების ადგილი: ქ. თბილისი.

დაამთავრა თბილისის სამხატვრო აკადემიის არქიტექტურის ფაკულტეტი 1957 წელს; სწავლობდა იმავე აკადემიის აკადემიის ასპირანტურაში, რომელიც დაამთავრა აკადემიკოს არჩილ ქურდიანის ხელმძღვანელობით.

აკადემიის დამთავრების შემდეგ დატოვებულ იქნა კათედრაზე პედაგოგად; მუშაობდა საპროექტო ინსტიტუტ "საქქალაქმშენსახპროექტში"; ამ პერიოდში დაამუშავა რამდენიმე საცხოვრებელი სახლის და საზოგადოებრივი დანიშნულების ობიექტის, ბაკურიანისა და წოდორეთის დაგეგმარების, ძველი თბილისის უბნისა და ძეგლების აღდგენა-რესტავრაციის პროექტები და სხვ.; იყო ტურიზმის საკავშირო ინსტიტუტის თბილისის ფილიალის დირექტორი; მონაწილეობას იღებდა საქართველოს სახალხო მეურნეობის მიღწევათა და კულტურული მემკვიდრეობის პავილიონის მშენებლობაში და ექსპოზიციის მოწყობაში თურქეთში (ქ. იზმირი); ავტორია მონრეალის "ექსპო 7"-ის პავილიონის პროექტისა და ექსპოზიციის, რისთვისაც დაჯილდოებულ იქნა დიდი ოქროს მედლით; 1996 წლიდან მუშაობდა ქ. მოსკოვში, იყო მანეჟის მოედნის რეკონსტრუქციის მთავარი არქიტექტორი, რომელიც აღინიშნა რუსეთის პრეზიდენტის მიერ დიდი ოქროს მედლით; 2000 წელს მიიწვიეს "მოსკვა-სიტის" პროექტის მთავარ არქიტექტორად, სადაც 2010 წლამდე მუშაობდა; 2000-2002წწ. ჩეხეთში დააპროექტა სასტუმრო 1000 ადგილზე ("კარლოვი ვარი"), ქ. ნიუ-იორკში (აშშ) დაპროექტებული აქვს ობიექტები კერძო შეკვეთით; მოწყობილი აქვს გამოფენები ქ. მოსკოვში (საქართველოს კულტურის ცენტრში) და ნიუ-იორკში; მისი ნამუშევრები დაცულია სხვადასხვა ქვეყნის სახელმწიფო და კერძო კოლექციებში; ქ. ტოკიოში, საგამოფენო კომპლექსის ერთ-ერთმა მფლობელმა ერთი პავილიონი მისი ფერწერისა და გრაფიკის ნამუშევრებს მუდმივ საგამოფენო ექსპოზიციას დაუთმო. მუშაობს ქ. თბილისის პერსპექტიული განვითარების პროექტების განხორციელებაზე (თანაავტორთან ერთად).

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.742

• საქართველოს "არქიტექტურის რაინდი"