გივი ჯიტავა

დაბადების ადგილი: ქ. ოჩამჩირე.

დაამთავრა ხარკოვის საინჟინრო-სამშენებლო ინსტიტუტის სამშენებლო ფაკულტეტი სამრეწველო და სამოქალაქი მშენებლობის სპეციალობით 1957 წელს.

 სახელმწიფო განაწილებით სამუშაოდ გაიგზავნა ქ. მაგადანში; 1957-1961წწ. მუშაობდა ქალაქის საბინაო მშენებლობის სამმართველოს ტექნიკური განყოფილების უფროსად, ხოლო შემდგომ ამავე სამმართველოს მთავარ ინჟინრად; სამშეობლოში დაბრუნების შემდეგ მუშაობდა საკავშირო დაქვემდებარების ჰიდრომექანიზაციის ტრესტში მმართველის მოადგილედ; 1966-1974წწ. იყო საქართველოს სასოფლო მშენებლობის სამინისტროს N11 და N53 მოძრავ მექანიზებული კოლონების უფროსი; 1975 წელს საქართველოს მინისტრთა საბჭოსა და აფხაზეთის მთავრობის ერთობლივი გადაწყვეტილებით, ოჩამჩირის რაიონში საქართველოს სსრ სასოფლო მშენებლობის სამინისტროს N7 სამშენებლო ტრესტის ჩამოყალიბების შემდეგ ტრესტის მმართველის თანამდებობაზე დაინიშნა; მისი ხელმძღვანელობით აშენდა და საექსპლუატაციოდ გადაიცა არაერთი სამრეწველო და სამოქალაქო დანიშნულების ობიექტი, მათ შორის: კომბინირებული საკვების ქარხანა და მეფრინველეობის ფაბრიკები ოჩამჩირეში, კინდღში, მერხეულში, ჩაის ფაბრიკები და მეცხოველეობის ობიექტები გაგრაში, ოჩამჩირეში, გამწმენდი ნაგებობები ოჩამჩირეში, პოლიკლინიკა-საავადმყოფოები და საცხოვრებელი კომპლექსი ოჩამჩირის, გულრიფშის, გალის, გუდაუთის რაიონებში და სხვა; დაჯილდოებული იყო სახელმწიფო ჯილდოებით, არაერთგზის იყო არჩეული აფხაზეთის ავტონომიური რესპუბლიკის უმაღლესი საბჭოს და ოჩამჩირის რაიონული საბჭოს დეპუტატად.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.750-751

• საქართველოს მშენებელთა კავშირი, წევრი

• აფხაზეთის დამსახურებული ინჟინერი