ვლადიმერ ჯიქია

დაბადების ადგილი: სოფელი ახუთი, ჩხოროწყუს რაიონი.

დაამთავრა საქართველოს პოლიტექნიკური ინსტიტუტის სატრანსპორტო ფაკულტეტი საავტომობილო გზების მშენებლობის სპეციალობით 1972 წელს.

1972 წლიდან მუშაობდა საპროექტო-საკვლევაძიებო ინსტიტუტში "ტრანსპროექტი" საგზაო განყოფილების ინჟინრის, უფროსი ინჟინრის, საკვლევაძიებო პარტიის უფროსის, პროექტის მთავარი ინჟინრის, მთავარი სპეციალისტის, განყოფილების უფროსის მოადგილის, ხოლო 1985 წლიდან საგზაო განყოფილების უფროსის თანამდებობაზე; დიდი წვლილი შეიტანა საავტომობილო გზების კვლევა-ძიებისა და დაპროექტების განვითარების, საგზაო ინჟინრების ტექნიკური ცოდნის დონის ამაღლებისა და მაღალკვალიფიციური კადრების აღზრდის საქმეში; მისი ხელმძღვანელობით და მონაწილეობით დაპროექტებულია მრავალი საავტომობილო გზის გარკვეული მონაკვეთები საქართველოში: "სამტრედია-გრიგოლეთის" 52 კმ ავტომაგისტრალის მშენებლობის, "ზესტაფონი-ქუთაისი-სამტრედიის" 58 კმ ავტომაგისტრალის, "თბილისი-რუსთავის" მაგისტრალური გზის, "თბილისი-სენაკი-ლესელიძის" მაგისტრალური გზის 27-43 კმ მონაკვეთის რეკონსტრუქცია-მოდერნიზაციის სამუშაოების, "აჭარის შემოვლითი გზების განვითარების პროექტის" ფარგლებში ქობულეთის შემოვლითი გზის მონაკვეთის და "ჩაქვი-მახინჯაურის" მონაკვეთის 4-ზოლიანი მაგისტრალის მოდერნიზების, "სენაკი-ფოთი-სარფის" (თურქეთის საზღვარი) მაგისტრალური გზის 89-96 კმ-ებზე მახინჯაურის მონაკვეთისა და გვირაბების მშენებლობის, "ვაზიანი-გომბორის-თელავის" საავტომობილო გზის 1-66 კმ სამშენებლო და სარეაბილიტაციო სამუშაოების, შიდასახელმწიფოებრივი და ადგილობრივი გზების პროექტის ფარგლებში საავტომობილო გზების სარეაბილიტაციო სამუშაოების და სხვა მრავალი; დიდი წვლილი აქვს შეტანილი აჭარის მთიანი რეგიონის საავტომობილო გზების ქსელის განვითარებაში; მისი ხელმძღვანელობით დაპროექტებულია არაერთი საავტომობილო გზა ამ რეგიონში, რისთვისაც 1986 წელს დაჯილდოვდა აჭარის უმაღლესი საბჭოს პრეზიდიუმის საპატიო სიგელით.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.751-752; წიგნი ღირსებისა: ტ. 2/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.127

• 1997 - ღირსების მედალი
  საქართველოს საავტომობილო გზების რეაბილიტაციისა და მოდერნიზაციის პროგრამის დამუშავებისთვისა და საავტომობილო გზების კვლევა-ძიებისა და დაპროექტების განვითარების საქმეში შეტანილი წვლილისათვის
• ღირსების ორდენი
  საქართველოს საგზაო ინფრასტრუქტურის განვითარებაში შეტანილი წვლილისთვის