თენგიზ ჯიქია

დაბადების ადგილი: სოფელი ახუთი, ჩხოროწყუს რაიონი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი 1975 წელს.

1975-1984წწ. მუშაობდა საქართველოს მშენებლობის სამინისტროს N1 სამშენებლო ტრესტის N1 სამშენებლო სამმართველოში ოსტატად, სამუშაოთა მწარმოებლად, უფროს სამუშაოთა მწარმოებლად; 1984-1989წწ. ამავე ტრესტის N3 სამშენებლო სამმართველოში მთავარ ინჟინრად, სამმართველოს უფროსად; 1989-1990წწ. იყო საქართველოს მინისტრთა საბჭოსთან არსებული კურორტების მართვის სამმართველოს "საქკურორტის" საპროექტო და სამშენებლო-სარემონტო გაერთიანების უფროსის მოადგილე; 1990-1992წწ. კონცერნ "საქკურორტის" ტექნიკურ დირექციაში დირექტორის მოადგილე; 1992-1998წწ. ფირმა "დავით აღმაშენებლის" გენერალური დირექტორი; 1998-2004წწ. სათავეში ედგა შპს "მშრალ თეჯს"; 2004-2006წწ. ქვემო ქართლის რეგიონული მშენებლობის საკონტროლო ორგანიზაციას "არქმშენინსპექციას"; 2007-2008წწ. მუშაობდა ასოციაცია "ატუს" საწარმოო-ტექნიკური განყოფილების უფროსად; 2008 წლიდან იყო ასოციაცია "ატუს" ტექნიკური დირექტორი, გენერალური დირექტორის პირველი მოადგილე; პროფესიული საქმიანობის სხვადასხვა ეტაპზე ხელმძღვანელობდა ფრანგული სკოლა-ლიცეუმის მშენებლობას, ეროვნული საჯარო ბიბლიოთეკის III კორპუსის, ს. ჯანაშიას სახელობის სახელმწიფო მუზეუმის კორპუსების, თსუ I კორპუსის, ჯ. კახიძის სახელობის მუსიკალური ცენტრის რეკონსტრუქციასა და აღჭურვას (მთ. არქიტექტორი ლერი მეძმარიაშვილი), ა. გრიბოედოვისა და კ. მარჯანიშვილის სახელობის, მოზარდ მაყურებელთა და მ. თუმანიშვილის სახელობის კინომსახიობთა თეატრების რეკონსტრუქცია-აღჭურვას თბილისში, ამწემშენებელი და ქიმიური ბოჭკოს (II-III-IV რიგების) ქარხნების გაფართოება-რეკონსტრუქციას, კაპროლაქტამის კომპლექსისა და N2 აგლოფაბრიკის მშენებლობას (რუსთავში), მოსწავლე ახალგაზრდობის პარკისა და ბოტანიკური ბაღის რესტავრაცია-რეკონსტრუქციას (ბათუმში), საავადმყოფო, სასტუმრო და სპორტული კომპლექსების მშენებლობას (საჩხერეში), ქალაქის ცენტრის რეკონსტრუქციას, პრომეთეს მღვიმის კომპლექსის აღჭურვას (წყალტუბოში); დიდი წვლილი აქვს შეტანილი ქართული რაგბის განვითარების პროგრამაში (სარაგბო სტადიონების კომპლექსების მშენებლობა თბილისში, ქუთაისში, რუსთავში, მარტყოფსა და ასპინძაში); მონაწილეობდა თბილისის ზ. ფალიაშვილის სახელობის ოპერისა და ბალეტის აკადემიური თეატრის (მთ. არქიტექტორი ლერი მეძმარიაშვილი) რეკონსტრუქცია-რესტავრაციასა და შეკვეთილის 10000-ადგილიანი საკონცერტო დარბაზის კომპლექსის მშენებლობაში; 1980-1982წწ. არჩეული იყო რუსთავის საქალაქო საბჭოს დეპუტატად; დაჯილდოებულია სსრკ მშენებლობის სამინისტროს საპატიო სიგელით, საქართველოს მინისტრთა საბჭოს I ხარისხის პრემია.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.753-754