ივანე ასკურავა

დაბადების ადგილი: ქ. ლანჩხუთი.

დაათავრა ბაქოს გიმნაზია და ერთხანს ეწეოდა პედაგოგიურ მოღვაწეობას. სცენაზე გამოვიდა 1907 წელს, ლანჩხუთის თეატრში, ი. ბაქრაძის პიესაში "ჩვენი დროის გმირები". უმთავრესად ასრულებდა სახასიათო როლებს (ლ. ანდრეევის პიესაში "დღენი ჩვენი ცხოვრებისა-ონუფრი ნიკოლაევიჩს, ვ. გუნიას პიესაში "ორი გმირი"- ტარიელს, ბელოის "უმუშევარში" - ეგორს და სხვ.). ლანჩხუთის გარდა, როგორც მსახიობი და დრამწრეების ხელმძღვანელი, მუშაობდა ბათუმის მუშათა კლუბებში, აგრეთვე ბათუმის აკადემიურ თეატრში. დაწერა პიესები: "თეთრი ყორანი" (4 მოქმ.), "შავი არშია"(დრამა 4 მოქმ.), "წითელი ჯამბაზი" (დრამა 3 მოქმ.), "ჩვენი ზეიმი" (საბავშვო პიესა). "თეთრი ყორანის" გარდა ყველა პიესა ბათუმისა და გურიის დაბა-სოფლების სცენაზე იდგმებოდა. დაწერა მოგონებანი "ლანჩხუთის თეატრის შესახებ" (ნაწყვეტი ინახება საქართველოს სახელმწიფო მუზეუმში), ჟურნალ "საბჭოთა ხელოვნებაში" დაბეჭდა "ლანჩხუთის თეატრის ისტორიიდან" (1936, №11-12, გვ. 58-59). თანამშრომლობდა ქართულ ჟურნალ-გაზეთებთან. ლანჩხუთის თეატრის ერთ-ერთი დამფუძნებელი.

წყარო: ქართველ მოღვაწეთა ლექსიკონი:1801-1952: ტ.I .-თბ.,2018.-გვ.217

• პატარა გამომგონებელი : საყმაწვილო მოთხრობა (აზრი აღებულია რუსულიდან) (ავტორი). - ტფილისი, ზარია ვოსტოკას სტ., 1930. - 27გვ.