იათეოზ ბერაძე

დაბადების ადგილი: სოფელი ხიდარი, ხარაგაულის რაიონი.

1891-1989 წწ. სწავლობდა თბილისის სასულიერო სემინარიაში. მასწავლებლობდა კიცხის, ძირულის, ხიდარის გლეხთა ახალგაზრდობისა და სხვა სკოლებში. 1913-1918 წწ. მუშაობდა კიცხის საკრედიტო ამხანაგობაში მოანგარიშე-თავმჯდომარად. 1918 წელს ხიდარში დააარსა მომხმარებელთა საზოგადოება (1928 წლამდე იყო მისი თავმჯდომარე). 1930 წელს შემოწირულობებით ხე-ტყის მასალა შეაგროვა და გლეხების დახმარებით ააშენა სკოლის შენობა. სამწერლო ასპარეზე გამოვიდა 1898 წელს. "ივერიასა" და სხვა ჟურნალ-გაზეთებში გამოაქვეყნა წერილები: "ახალი წელი", "ბნელეთელი ექიმი", "თავის მკვლელობა", "თანამედროვე ცივილიზაციამ მოუტანა თუ არა ხალხს ბედნიერება?", "თაფლი, მისი მკურნალობითი თვისება და ნოყიერება", "ომი", "პატარ-პატარა მოთხრობები", "სამაცდურო ქუჩა" (დემიან ბედნის პოემა), "საშუალება სიმთვრალის წინააღმდეგ" (დაიბეჭდა "სამშობლოს" დამატებაში), სტრუვეს წერილი ეკონომიკაზე - "მერმისი რუსეთისა", "ცოტა რამ სამღვდელოებაზე", "ჭეშმარიტი ქადაგების ძალა" და სხვ.

წყარო: ქართველ მოღვაწეთა ლექსიკონი:1801-1952: ტ.I/იოსებ იმედაშვილი -თბ.,2018.-გვ.360