თეოდოს III

ბავშვობიდანვე ბიზანტიაში იზრდებოდა. ლეონ III-ის გარდაცვალების შემდეგ (967) მსხვილ ფეოდალთა ჯგუფმა, რომელიც ცენტრალური ხელისუფლების გაძლიერების წინააღმდეგი იყო, თეოდოს III დაუპირისპირეს ძმას - ახალ გამეფებულ დემეტრე III -ს. ტახტისათვის ბრძოლაში თეოდოს III დამარცხდა. დემეტრე III-ის ბრძანებით იგი დააბრმავეს, რის გამოც წყაროებში მოიხსენიება როგორც "თვალდამწვარი", "მწუხარე". თეოდოს III გამეფდა უძეოდ გარდაცვლილი დემეტრე III-ის შემდეგ. ბრმა მეფის მმართველობას ფეოდალური ანარქიის გაძლიერება მოჰყვა. გაერთიანებული საქართველოს პირველმა მეფემ ბაგრატ III-მ ტახტიდან გადაყენებული თეოდოს III 978 წელს ტაოში გაგზავნა დავით III კურაპალატთან. ამის შემდეგ ის წყაროებში აღარ იხსენიება. აფხაზთა სამეფოს (დასავლეთ საქართველო) მეფე დაახლოებით 975-978 წლებში, გიორგი II-ის ძე.

წყარო: საქართველო: ენციკლოპედია: ტ. IV. -თბ., 2018. -გვ.42