დავით გაგლოევი

მუშაობდა თბილისის საქალაქო თვითმმართველობაში, გახსნა აგურისა და ხის სახერხი ქარხნები. შემოსავლების დიდ ნაწილს საზოგადოებრივი და რევოლუციური საქმიანობისათვის იყენებდა. 1880 წელს გაიცნო რუსეთიდან გადმოსახლებული ნაროდნიკ-რევოლუციონერები და მათგან მოწოდებულ ლიტერატურას მუშებში ავრცელებდა. 1885-1886 წლებში დაუახლოვდა "ნაროდნაია ვოლიას" მიმდევრებს. 1880-იან წლებში, როგორც ხალხოსანმა სხვებთან ერთად დააფუძნა არალეგალური წიგნთსაცავი და ლეგალური სტამბა, 1890-იან წლებში გაიცნო "მესამე დასის" (მარქსისტების) ჯგუფი. ამ ჯგუფის გავლენით მუშათა შორის მარქსიზმის გავრცელებას ყოველნაირად ეხმარებოდა. სოციალ-დემოკრატიული პარტიის ორ ფრაქციად გაყოფის შემდეგ ბოლშევიკურ პარტიას მიემხრო. 1903 წელს მის სახლში მოაწყვეს არალეგალური საბეჭდი დაზგა, იქვე ინახებოდა პარტიის ლიტერატურა. 1905 წელს ავჭალის ქუჩაზე მოაწყო წიგნთსაცავ-სამკითხველო, სადაც ინახებოდა არალეგალური ლიტარატურა და რევოლუციონერები ერთმანეთს ხვდებოდნენ. დავით გაგლოევმა სხვებთან ერთად მონაწილეობა მიიღო "ქართველთა გამომცემლობის ამხანაგობის დაარსებაში", იყო "ქართველთა შორის წერა-კითხვის გამავრცელებელი საზოგადოების" მუდმივი წევრი. 1918 წელს ბოლშევიკებს გადასცა სტამბა, სადაც გაზეთი "კომუნისტი" იბეჭდებოდა. იყო პოლიტკატორღელთა საზოგადოების - "ნაროდნოვოლცების" წრის წევრი. რევოლუციონერი, ხალხოსანი, არალეგალური მუშაკი, პროპაგანდისტ-აგიტატორი, საზოგადო მოღვაწე. 

წყარო: ქართველ მოღვაწეთა ლექსიკონი:1801-1952: ტ.I . ა-დ/იოსებ იმედაშვილი.-თბ.,2018.-გვ.477

• ქართველთა შორის წერა-კითხვის გამავრცელებელი საზოგადოება, მუდმივი წევრი