ზურაბ თვალჭრელიძე

 დაბადების ადგილი: ქ. თბილისი.

დაამთავრა ივანე ჯავახიშვილის სახელობის თბილისის სახელმწიფო უნივერსიტეტის ისტორიის ფაკულტეტი 1974 წელს.

1975 წლიდან მუშაობდა ს. ჯანაშიას სახელობის ეროვნულ მუზეუმში; ოთხი ათეული წლის მანძილზე ხელმძღვანელობდა შუა საუკუნეების ეპოქის ქართული კულტურის მემკვიდრეობის შემსწავლელ მნიშვნელოვან პროექტებს: 1978-1980 წწ. ქცია-ხრამის ხეობის კლდის ძეგლების შემსწავლელ არქეოლოგიურ ექსპედიციას; 1983-1995 წწ. გარეჯის ნათლისმცემლის მონასტრის სტაციონარულ არქეოლოგიურ ექსპედიციას, ხოლო 1996 წლიდან იგი სათავეში ედგა დავით გარეჯის სამონასტრო კომპლექსის შემსწავლელ არქეოლოგიურ ექსპედიციას; 2006-2017 წწ. იყო საქართველოს ეროვნული მუზეუმის გენერალური დირექტორის მოადგილე, მთავარი კონსერვატორი (ამ პერიოდში განხორციელდა მუზეუმების რეაბილიტაციის და ექსპოზიციების განახლების მნიშვნელოვანი პროექტები); 2017-2020 წწ. ხელმძღვანელობდა საქართველოს ეროვნული მუზეუმის შუა საუკუნეების კულტურული მემკვიდრეობის კვლევის ცენტრს. ზ. თვალჭრელიძის სამეცნიერო ინტერესების პრიორიტეტულ მიმართულებას წარმოადგენდა გარეჯის მრავალმთის სამონასტრო გაერთიანებისა და ზოგადად ქართული მონასტიციზმის პრობლემების ისტორიულ-არქეოლოგიური ასპექტებით კვლევა, წინაქრისტიანული ხანის ქართული კულტურული მემკვიდრეობის საკითხები. 2010 წელს ზ. თვალჭრელიძემ გამოაქვეყნა ნაშრომი, რომელშიც წარმოდგენილი იყო წმ. იოანე ნათლისმცემლის მონასტერში ჩატარებული მრავალწლიანი სამეცნიერო-კვლევითი სამუშაოების შედეგები. ასევე გამოქვეყნებული აქვს მრავალრიცხოვანი ნაშრომები, როგორც ქართულ, ისე უცხოურ პერიოდულ გამოცემებში. ამასთანავე, იგი იყო საქართველოს ეროვნული მუზეუმის მოამბის რედაქტორი, ადგილობრივი და საერთაშორისო სამეცნიერო პროექტებისა და კონფერენციების მონაწილე. ისტორიის მეცნიერებათა დოქტორი, პროფესორი.

• გარეჯის მრავალმთის არქეოლოგიური ძეგლები = Archaeological monuments of the Gareja Desert : წმ. იოანე ნათლისმცემლის მონასტერი (ავტორი). - თბილისი, 2010. - 196გვ.. - ISBN: 978-9941-0-3044-4
• გარეჯის ნათლისმცემლის უდაბნო-მონასტერი : წყაროების მიმოხილვა (ავტორი). - თბილისი, 1993. - 16გვ.
• დოდოს რქის უდაბნო-მონასტრის მოჭიქული კერამიკა (IX-XIV სს.) (ავტორი). - თბილისი, 1993. - 16გვ.
• გარეჯის ნათლისმცემლის უდაბნო-მონასტრის კერამიკის შესწავლისათვის (XI-XIIIსს.) (ავტორი). - თბილისი, 1993. - 13გვ.