თინათინ ბაიაშვილი

დაბადების ადგილი: სოფელი სიმონიანთხევი, თიანეთის რაიონი.

დაამთავრა თბილისის სახელმწიფო უნივერსიტეტის გეოგრაფია-გეოლოგიის ფაკულტეტი ფიზიკური გეოგრაფიის სპეციალობით 1973 წელს.

1973 წელს მუშაობა დაიწყო თბილისის მუშა-ახალგაზრდობის მე-17 საშუალო სკოლაში გეოგრაფიის მასწავლებლად; 1976 წელს გადაყვანილ იქნა თბილისის მე-14 საშუალო სკოლაში; 1977 წლიდან მიიწვიეს პიონერთა და მოსწავლეთა (ამჟამად მოსწავლე ახალგაზრდობის) რესპუბლიკურ სასახლეში გეოგრაფია-გეოლოგიის კაბინეტის პედაგოგად; 1984 წლიდან ამავე კაბინეტის გამგეა; პარალელურად აგრძელებდა მუშაობას მე-14 საშუალო სკოლის გეოგრაფიის მასწავლებლად 1986 წლამდე; მოსწავლე ახალგაზრდობის რესპუბლიკურ სასახლეში გეოგრაფია-გეოლოგიისა და მხარეთმცოდნეობის ხაზით ყოველწლიურად ატარებდა მოსაწვლეთა რესპუბლიკურ შეკრებებსა და კონფერენციებს, ეწეოდა მეთოდურ მუშაობას რესპუბლიკის მასშტაბით, ახდენდა მოსწავლეთა შრომებისა და ბროშურების რედაქტირებას. გამოქვეყნებული აქვს რამდენიმე მეთოდური ბროშურა: ნორჩ გეოლოგთა და გეოგრაფ-მხარეთმცოდნეთა დასახმარებლად. პირველი კატეგორიის მასწავლებელი (1991).

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.34-35

• 1984 - სახალხო განათლების წარჩინებული მუშაკი