გრიგოლ გლურჯიძე

დაბადების ადგილი: სოფელი ბერშუეთი, გორის რაიონი.

სწავლობდა გორის სასულიერო სასწავლებელსა (იოსებ ჯუღაშვილთან ერთად) და თბილისის სასულიერო სემინარიაში.

1897 წლიდან მასწავლებლობდა სოფელ ბერშუეთში, ამავე დროს დაიწყო კულტურულ-საგანმანათლებლო და რევოლუციური მოღვაწეობა. პირველი რევოლუციის დროს (1905), გლეხებში ავრცელებდა არალეგალურ ლიტერატურას, ხელმძღვანელობდა სოფლის სახალხო სასამართლოს, ზრუნავდა წითელი რაზმების შედგენისათვის და სხვ. 1908-1909წწ. არალეგალურად ცხოვრობდა თბილისსა და სოფელ ხიდისთავში, იყო პოლიციის მეთვალყურეობის ქვეშ. 1910-1914წწ. ცხინვალის რაიონის სოფელ ვანათში მასწავლებლობდა, 1915-1923წწ.- ყოფილი სიღნაღის მაზრის სოფელ ჩაილურში, სადაც გახსნა წერა-კითხვის უფასო სკოლა გლეხის ბავშვებისათვის. 1924 წელს დაინიშნა ბერშუეთის ოთხწლედის გამგე-მასწავლებლად. მონაწილეობდა საზოგადოებრივ საქმიანობაშიც; 1939 წელს აირჩიეს გორის რაიონის საბჭოს დეპუტატად (მეორედ 1948 წელს), მონაწილეობდა მოსკოვში გამართულ სოფლის მასწავლებელთა თათბირში. 1940 წელს აირჩიეს საქართველოს სსრ დაწყებითი და საშუალო სკოლების მუშაკთა პროფკავშირის ცენტრალური კომიტეტის პლენუმის წევრად, 1944 წელს- ბერშუეთის სასოფლო საბჭოს აღმასკომის წევრად და სხვ.

წყარო: ქართველ მოღვაწეთა ლექსიკონი, 1801-1952: ტ. I ა-დ / იოსებ იმედაშვილი.-თბ.,2018.-გვ.604

• სკკპ (1940-)

• 1939 - ლენინის ორდენი
  ხანგრძლივი და ნაყოფიერი პედაგოგიური მოღვაწეობისათვის
• მედალი "1941-1945 წლებში დიდ სამამულო ომში მამაცური შრომისთვის"
• მედალი "კავკასიის დაცვისთვის"
• საქართველოს დამსახურებული მასწავლებელი