ივანე გაბუნია

დაბადების ადგილი: სოფელი ახუთი, ჩხოროწყუს რაიონი.

დაამთავრა ქუთაისის პედაგოგიური ინსტიტუტის გეოგრაფიის ფაკულტეტი გეოგრაფიის სპეციალობით 1951 წელს.

1952-1979წწ. მუშაობდა ოჩამჩირის რაიონის ახალი კინდღის საშუალო სკოლის გეოგრაფიის მასწავლებლად, სასწავლო ნაწილის გამგედ, სკოლის დირექტორად; 1962-1980წწ. ქ. სოხუმის მე-2 საშუალო სკოლა-ინტერნატის გეოგრაფიის მასწავლებლად; 1975 წლიდან მიწვეული იყო სოხუმის პედაგოგიურ ინსტიტუტში ლექციების წასაკითხად; 1979 წლიდან მუშაობდა სოხუმის უნივერსიტეტის გეოგრაფიის კეთედრის დოცენტად; 1992 წლიდან აფხაზეთიდან იძულებით გადაადგილებული ცხოვრობს თბილისში და მუშაობს თბილისის სახელმწიფო უნივერსიტეტის სოხუმის ფილიალში გეოგრაფიის კათედრის გამგედ, ხოლო შეთავსებით ვახუშტი ბაგრატიონის სახელობის გეოგრაფიის ინსტიტუტის ეკონომიკური გეოგრაფიის განყოფილების უფროს მეცნიერ-თანამშრომად. მის საკანდიდატო დისერტაციაში მოცემულია დარგის განვითარების ბუნებრივ-გეოგრაფიული, ისტორიულ-კულტურული და ეკონომიკური წანამძღვრები. გაშუქებულია საკურორტო-ტურისტული საქმიანობის ისტორია. გარკვეული ადგილი ეთმობა აფხაზეთის რეკრეაციულ დარაიონებას, საკურორტო-ტურისტული მეურნეობის ეფექტიანობისა და რენტაბელობის საკითხებს. განხილულია საკურორტო-ტურისტული მეურნეობის განვითარების პერსპექტივები. ამ საკითხებზე გამოქვეყნებული აქვს 30-მდე სამეცნიერო ნაშრომი. გეოგრაფიულ მეცნიერებათა კანდიდატი, დოცენტი (1985).

საკანდიდატო დისერტაციის თემა - "აფხაზეთის ასსრ საკურორტო-ტურისტული მეურნეობა", დაიცვა 1973 წელს.

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.54-55

• 2002 - ღირსების მედალი

• აფხაზეთის ასსრ საკურორტო-ტურისტული მეურნეობა (ავტორი). - სოხუმი, ალაშარა, 1979. - 101გვ.