შალვა გოგებაშვილი

დაბადების ადგილი: სოფელი ვარიანი, გორის რაიონი.

დაამთავრა გორის სასულიერო სასწავლებელი, (სახელმწიფო ხარჯით), თბილისის სასულიერო სემინარია (4 კლასი) და კიევის უმაღლესი კომერციული ინსტიტუტი 1913 წელს. შეისწავლა საბანკო და პედაგოგიური საკითხები.

პროფესორ ვობლის და კოსინსკის ხელმძღვანელობით მეცადინეობდა კოოპერაციის შემსწავლელ სპეციალურ სემინარებში. იგი დარწმუნებული იყო, რომ ხალხის კოოპერაციაში ჩაბმა ხელს შეუწყობდა კაპიტალის ექსპლოატაციის წინააღმდეგ ბრძოლას. ინსტიტუტის დამთავრებისთანავე, შალვა გოგებაშივილი მიიწვიეს სიღნაღის საურთიერთო ნდობის ბანკში, ჯერ გამგეობის წევრად, შემდეგ თავმჯდომარედ. მონაწილეობდა სიღნაღის მომხმარებელთა კოოპერატივის დაარსებაში. 1915 წელს, გორის საურთიერთო ნდობის ბანკში სამსახურის დროს, დააარსა სამომხმარებლო კოოპერატივი (დაახლოებით 1500 წევრი). 1916 წელს, თბილისში კავკასიის სასოფლო-სამეურნეო საზოგადოებაში კოოპერაციის ინსტრუქტორად მიიწვიეს. მისი უშუალო მონაწილეობით დაარსდა კოოპერატივთა კავშირი (ცეკავშირი) 1916 წლის 14 მაისს, რომლის საბჭოს წევრადაც იქნა არჩეული. 1917-1922წწ. იყო გამგეობის წევრი, შემდეგ საფინანსო, საბანკო და სხვა განყოფილებების გამგე. 1919 წელს მონაწილეობდა საქართველოს კოოპერაციული ბანკის დაარსებაში, რომლის წესდება შეიმუშავა, ყველა წინასწარი მუშაობა ჩაატარა და ბანკის დაარსებისთანავე მისი საბჭოს თავმჯდომარედ იქნა არჩეული. ჟურნალ-გაზეთებში აშუქებდა კოოპერაციის სხვადასხვა საკითხს. სტუდენტობის დროს საკრედიტო კოოპერაციაზე წერილებს ათავსებდა გაზეთებში ("კოოპერაციის მნიშვნელობა სასოფლო მეურნეობაში"; "სახალხო გაზეთი", 1912, №514, 515; "კრედიტი და ბანკი"-"სახალხო გაზეთი", 1912, № 605, 606, 608, 611-613), შემდეგ წერდა "ხმა კახეთისა" (სიღნაღი), 1917 წლიდან - ცეკავშირის საგანგებო გამოცემებში. იყო თბილისის სახელმწიფო უნივერსიტეტის აღრიცხვისა და სამეურნეო საქმიანობის ანალიზის კათედრის დოცენტი, ეკონომიურ მეცნიერებათა კანდიდატი. კოოპერატორი. (ზოგიერთი ცნობით შალვა გოგებაშვილი დაბადებულია 1887 წელს). იაკობ გოგებაშვილის ძმისშვილი. 

წყარო: ქართველ მოღვაწეთა ლექსიკონი, 1801-1952: ტ. I ა-დ / იოსებ იმედაშვილი.-თბ.,2018.-გვ.624

• მომხმარებელთა კოოპერატივის ორგანიზაცია და წესდების საფუძვლები : დაუსწრებელ რადიო კოოპ. კურსებზე წაკითხულ ლექციათა კრებული (ავტორი). - ტფილისი, რადიო ცენტრის და ცეკავშირის გა-მა, 1930. - 29გვ.
• სამომხმარებლო კოოპერაციის ორგანიზაცია და პრაქტიკა (ავტორი). - ტფილისი, ცეკავშირის გა-მა და სტ., 1929. - 416გვ.
• სამომხმარებლო კოოპერაციის ორგანიზაცია და პრაქტიკა : ორ ნაწილად : მოკლე სახელმძღვანელო მომხმარებელთა კოოპერატივის პრაქტიკულ საქმიანობის შესასწავლად და კოოპერატივებში მომუშავეთათვის დასახმარებლად (ავტორი). - ტფილისი, ცეკავშირის გამოცემა და სტამბა, 1925. - 276გვ.
• ანგარიშთა და საქმეთა წარმოება კოოპერატივის საკრედიტო განყოფილებაში (ავტორი). - ტფილისი, ცეკავშირის გამოცემა და სტამბა, 1924. - 40გვ.