იური იარვეტი

დაბადების ადგილი: ქ. ტალინი.

 დაამთავრა ტალინის თეატრალური ინსტიტუტი 1949 წელს. 

თეატრში სპორტიდან მივიდა, ფლობდა ტალინის ჩემპიონის წოდებას ტანვარჯიშში; 1940 წელს მიიღეს ტალინის მუშათა თეატრის მოცეკვავეთა ანსამბლში; 1949 წლდან მუშაობდა სამხრეთ ესტონეთის თეატრის მთავარ რეჟისორად; 1952 წლიდან იყო ტალინის კინგისეპის სახელობის დრამატული თეატრის მსახიობი; 1965-1967წწ. მოსკოვის ახალგაზრდულ თეატრში მოღვაწეობდა. სასცენო მოღვაწეობა კომიკური როლების შესრულებით დაიწყო, შემდეგ კი შექმნა ტრაგიკომიკური და რთული დრამატული სახეები; მის მიერ შექმნილი როლებიდან აღსანიშნავია: კრეონი (სოფოკლეს "ანტიგონე"), მასხარა (ტამსაარეს "მეფეს სცივა", "ადამიანი და ღმერთი"), კლავდიუსი (უ. შექსპირის "ჰამლეტი"), პოპრიშჩინი (ნ. გოგოლის "შეშლილის წერილები") და კრეპი (ს. ბეკეტის "კრეპის უკანასკნელი ფირი"); მის მიერ განხორციელებული სცენური სახეები აჩვენებს ადამიანის შინაგანი სამყაროს ღრმა წვდომის უნარს, მის შემოქმედებით ევოლუციას პლასტ. მონახაზის არტისტიდან შინაგანი ფსიქოლოგიზმის ოსტატამდე; გადაღებულია ფილმებში: "მკვდარი სეზონი" (1968), "მეფე ლირი" (1971) "სოლარისი" (1972) და სხვ.; ქართულ სატელევიზიო მრავალსერიან მხატვრულ ფილმში "დათა თუთაშხია" (1979) შეასრულა გრაფი სეგედის როლი (გაახმოვანა რ. თავართქილაძემ, ხმის ტემბრი, თხრობის მანერა ორგანულად შეერწყა გმირის მხატვრულ სახეს); მიღებული აქვს სახელმწიფო ჯილდოები. ესტონეთის დამსახურებული არტისტი (1964).

წყარო: საქართველო: ენციკლოპედია: ტ. IV. -თბ., 2018. -გვ.170-171

• 1981 - სსრკ სახელმწიფო პრემია
• 1975 - სსრკ სახალხო არტისტი