შტეფი იუნგერ-ხოტივარი

დაბადების ადგილი: ქ. ლაიფციგი.

დაამთავრა ბერლინის ჰუმბოლდტის სახელობის უნივერსიტეტი რუსულ-ტაჯიკური ენებისა და ლიტერატურის განხრით.

XX საუკუნის 70-იან წლებში დაინტერესდა ქართული ენითა და ლიტერატურით. ქართული ენა შეისწავლა იენის უნივერსიტეტში გერმანელი ქარ­თველოლოგის გ. პეჩის ხელმძღვანელობით; 1973 წელს სა­ქარ­თვე­ლოში ჩა­მო­ვი­და და თბილისის სახელმწიფო უნივერსიტეტში სტაჟირება გაიარა; მისი პირველი სამეცნიერო გამოკვლე­ვა "კონსტანტინე გამსახურდია გერმანიაში (1912-1913წწ.)" გამოქვეყნდა სა­ქარ­თვე­ლო­ში 1978 წელს; პირველი მონოგრაფია "ქართული ისტორიული რომანის განვითარება (მ. ჯავახი­შვი­ლი, კ. გამსახურდია, გ. აბაშიძე, ო. ჭილაძე, ჭ. ამირეჯიბი)" – ბერლინში 1993 წელს. ის თავის მეუღლესთან, ა. ხოტივართან ერთად მუშაობს ჰუმბოლდტის სახელმწიფო უნივერსიტეტში, იკვლევს უახლესი ქართული ლიტერატურის განვითარების გზებს, გერმანულ პრესაში სისტემატურად აქვეყნებს ქართული ლიტერატურის და ქართველი მწერლების შე­სა­ხებ სტატიებს, რეცენზიებს, ქართველ მწერალთა ნაწარმოებების თარგმანებს (ი. ჭავჭავაძე, ვაჟა-ფშაველა, ა. წერეთელი, გ. ტაბიძე, ა. კალანდაძე, ნ. დუმბაძე, ი. აბაშიძე და სხვ.); მისი სტატიები იბეჭდებოდა ქართულ ჟურნალებშიც ("კრიტიკა", "ცისკარი"). მან ე. ხინთიბიძის დახმარებით მოიპოვა და მასთან ერთად 2005 წელს სა­ქართვე­ლო­ში გამოსცა XX ს. 50-იან წლებში მ. პრიტვიცის მიერ გერმანულ ენაზე შესრულებული "ვეფხისტყაოსნის" თარგმანი. იგივე თარგმანი 2011 წელს გამოიცა ბერლინში; ის ჰუმბოლდტის უნივერსიტეტში უცხოელებს ქართულ ენას ასწავლის; 2010 წელს გამოსცა წიგნი "ქართული სა­ხელმ­ძღვა­ნე­ლო სპეციალურად უცხოელებისათვის", რომლის პრეზენტაციაც თბილისში გაიმართა; 2005-2012წწ. იყო გერმანულ­ენოვანი ქართველოლოგიური ჟურნალ "გე­ორგიკის" რედაქტორი (მ. ლორთქიფანიძესთან ერთად); გერმანიაში ქართული კულ­ტურის ელჩი, გერმანელი ქართველოლოგი.

საკანდიდატო დისერტაციის თემა - "კონსტანტინე გამსახურდია და მისი შემოქმედების ადრინდელი რომანები (1912-1935)", 1979 წელს ბერლინის უნივერსიტეტში; სადოქტორო დისერტაციის თემა - "ქართული ისტორიული რომანის განვითარების გზები", დაიცვა 1994 წელს თბილისის სახელმწიფო უნივერსიტეტში.

წყარო: საქართველო: ენციკლოპედია: ტ. IV. -თბ., 2018. -გვ.399-400; ghn.ge

• Winzige Freunde : Vier georgische Märchen und eine Geschichte von Niko Lomouri für die jüngsten Leser/ausgewählt und übersetzt von Steffi Chotiwari-Jünger und Artschil Chotiwari (მთარგმნელი). - Ludwigsburg, Pop, 2017. - 161p.. - ISBN: 9783863561628
• Georgische Autorinnen aus 11 Jahrhunderten : Prosa - Lyrik - Drama (შემდგენელი). - Aachen, Shaker Verlag, 2014. - 192p.. - ISBN: 9783844032062
• ქართველები ბერლინში : ავტორიზებული თარგმანი (ავტორი). - თბილისი, საქ. პარლამენტის ილია ჭავჭავაძის სახ. ეროვნ. ბიბ-კა, 2001. - 68გვ.. - ISBN: 9992802456