ოთარ იშხნელი

დაბადების ადგილი: სოფელი ჩხარი, ახლანდელი თერჯოლის მუნიციპალიტეტი.

დაამთავრა სამხედრო სამეთაურო კურსები ქ. ლვოვში.

1939 წელს გაიწვიეს სავალდებულო სამხედრო სამსახურში; 1939-1945წწ. II მსოფლიო ომის დაწყებისთანავე ჩაება ბრძოლებში ბრო­დის, ლვოვის, ტერნოპოლის, ჟიტომირის, კრემენჩუგის, პოლტავის, ბოგოლიუ­ბოვოს და ხარკოვის მიმართულებით; 1941 წელს ჩავარდა ტყვედ; იმყოფებოდა ხარკოვის, პოლტავის, კრემენჩუგის ტყვეთა ბანაკებში; თავდაპირველად გადაიყვანეს რუმინეთში, ხოლო 1943 წლის ბოლოს – სამხრეთ საფრანგეთში; 1942 წლიდან იყო ტყვეთა ბანაკების არალეგალური ანტიფაშისტური ორგანიზაციის ხელმძღვა­ნელი; 1944 წლის დასაწყისში მისი ხელმძღვანე­ლობით მოეწყო ტყვეთა აჯანყება, რომელიც გადაიზარდა პარტიზანულ მოძრაობაში ქ. კარბოსთან მდებარე "ლაპლანების ტყეში"; 1944 წლის აგვისტოში, როდესაც დაიწყო საფრანგეთის წინააღმდეგობის მოძრაობის საერთო ­გამოსვლები, მათ უკვე გაერთიანებული ძალით ­აიღეს ქ. ალბი (დეპარტამენტის ­ცენტრი). წინააღმდეგობის შტაბმა მას დაავალა რეგულარული სამხედრო ფორმირების შექმნა; შეიქმნა პოლკი, რომლის მეთაურად დაინიშნა; პოლკში საბჭოთა მეომრებთან ერ­თად ირიცხებოდნენ ფრანგები, ესპანელები, პოლონელები, იუგოსლავები და სხვ.; ის ფრანგებისათვის ცნობილი იყო "მაკი ჟორჟიენის" სახელით. როცა ქ. ტულუზის განთავისუფლებისადმი მიძღვნილი დიდი აღლუმი გაიმართა, ტრიბუნაზე იდგნენ მარშალი დე გოლი, პოლკოვნიკი კენინგი და "მაკი ჟორჟიენი"; 1945 წლის ოქტომბერში  სამშობლოში დაბრუნდა; ტყვედ ყოფნის გამო იყო რეპრესირებული – მიესაჯა 20 წლით პატიმრობა; 1955 წლის ამნისტიის საფუძველზე გაათავისუფლეს; დაჯილდოებუ­ლია საფრანგეთის რესპუბლიკის უმაღლესი ჯილდოთი – ორდენით "სამხედრო ჯვარი ხმლითა და ვერცხლის ვარს­კვლავით", "მამაცობის" ორდე­ნით, და მედლით "წინააღმდეგობისათვის" და სხვა; საფრანგეთის წინააღმდეგობის მოძრაობის ერთ-ერთი ორგანიზატორი, საფრანგეთის არმიის პოლკოვნიკი.

წყარო: საქართველო: ენციკლოპედია: ტ. IV. -თბ., 2018. -გვ.404