ოთარ კანდელაკი

დაბადების ადგილი: ქ. თბილისი.

დაამთავრა თბილისის სასოფლო-სამეურნეო ინსტიტუტის მექანიზაციის ფაკულტეტი აგრონომ-მექანიზატორის კვალიფიკაციით 1932 წელს.

მუშაობდა სხვადასხვა აგროკლიმატოლოგიურ სადგურებში (სკრა, ჩაქვი, ბაკურიანი და სხვ.), საქართველოს ჰიდრომეტსამმართველოში აგრომეტეოროლოგიის განყოფილებაში; 1953 წლიდან მუშაობდა თბილისის ჰიდრომეტეოროლოგიის სამეცნიერო-კვლევით ინსტიტუტში უფროსი მეცნიერი თანამშრომლის თანამდებობაზე. შემდეგ საქართველოს მევენახეობის, მეღვინეობის, მებაღეობისა და მეხილეობის სამეცნიერო-კვლევით ინსტიტუტში. გამოქვეყნებული აქვს 30 სამეცნიერო ნაშრომი, რომლებშიც განხილულია საქართველოს აგროკლიმატური პირობები და აგროკლიმატური რესურსები; 1947 წელს მიიღო საავტორო მოწმობები გამოგონებაზე "ნიადაგის ამაორთქლებელი", 1975 წელს - "ვენახების სეტყვისაგან დასაცავი მოწყობილობა" და "მუდმივი ტენიანობის აორთქლების ჩამწერზე". ეწეოდა პედაგოგიურ მოღვაწეობას თბილისის სახელმწიფო უნივერსიტეტში გეოგრაფია-გეოლოგიის ფაკულტეტზე, სადაც კითხულობდა აგროკლიმატოლოგიისა და აგრომეტეოროლოგიის კურსს. სოფლის მეურნეობის მეცნიერებათა კანდიდატი, დოცენტი (1970).

საკანდიდატო დისერტაციის თემა - "შიდა კახეთის ვენახების ნიადაგის ტენიანობის დინამიკა", დაიცვა 1950 წელს.

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.140

• აჭარის მთიანეთის აგროკლიმატური რესურსები (ავტორი). - ბათუმი, საბჭ. აჭარა, 1983. - 56გვ.