ეთერ კაციტაძე

დაბადების ადგილი: სოფელი ხოტევი, ამბროლაურის რაიონი.

დაამთავრა ქუთაისის სახელმწიფო პედაგოგიური ინსტიტუტის საბუნებისმეტყველო გეოგრაფიის ფაკულტეტი გეოგრაფიის სპეციალობით 1938 წელს.

1927-1933წწ. სხვადასხვა ტიპის სკოლებში მასწავლებლად მუშაობდა. 1935-1936წწ. ჯერ კიდევ სტუდენტობის დროს, მუშაობდა ფიზიკური გეოგრაფიის კათედრაზე, ხოლო ინსტიტუტის დამთავრების შემდეგ, გეოგრაფიის კათედრაზე ლაბორანტად დაიწყო მუშაობა; 1938-1941წწ. თბილისის სახელმწიფო უნივერსიტეტის ქვეყანათმცოდნეობის კათედრაზე გაიარა ასპირანტურის კურსი. ასპირანტურის დამთავრების შემდეგ, პენსიაზე გასვლამდე (1987), მუშაობდა ქუთაისის პედაგოგიურ ინსტიტუტში გეოგრაფიის კათედრის უფროს მასწავლებლად. კითხულობდა ლექციების კურსს დედამიწისმცოდნეობასა და საქართველოს ფიზიკურ გეოგრაფიაში, გეომორფოლოგიაში. მისი მეცნიერული მუშაობის თემატიკა მოიცავდა რაჭა-ლეჩხუმისა და იმერეთის რეგიონების ფიზიკურ-გეოგრაფიული (ლანდშაფტური) პრობლემების კვლევას. ამ საკითხებთან დაკავშირებით გამოქვეყნებული აქვს ორ ათეულზე მეტი ნაშრომი. განსაკუთრებით აღსანიშნავია რაჭა-ლეჩხუმში ჩატარებული კვლევის შედეგები.

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.143