რომანოზ დეკანოსიძე

XX საუკუნის დასაწყისში, ხარაგაულში სკოლა-სამლოცველო რომანოზ დეკანოსიძემ საკუთარი სახსრებით, უანგაროდ ააშენა (გარდაცვლილი ქალიშვილის სახელზე). ფულის შესაგროვებლად თავისი კუთვნილი მამულები გაყიდა, სულ 10 000 მანეთი დაუხარჯავს და დიდად არც არავინ დახმარებია, მაგრამ მაინც დაუსრულებია ეს დიდებული საქმე. შენობის მშენებლობა დაახლოებით 1900-1901 წლებში დასრულებულა, რომანოზ დეკანოსიძეს პედაგოგებიც თავისი სახსრებით მოუწვევია, ხოლო ტაძრისათვის მიწები შეუწირავს. 1900 წელს გაზეთი "ივერია" წერდა: "მღვდელმა რომანოზ დეკანოსიძემ განიზრახა მიეშენებინა თავის სახლისათვის სამსართულიანი ქვიტკირის შენობა იმ გეგმით, რომ ქვედა ორ სართულში მოთავსებულიყო ორკლასიანი საეკლესიო-სამრევლო სასწავლებელი, ხოლო მესამე სართულზე გაემართა ეკლესია სკოლისათვის (აღნიშნული სკოლა თავად რომანოზ დეკანოსიძემ დააარსა 1897 წელს და შენობის უქონლობის გამო დახურვა ემუქრებოდა)". ქველმოქმედი, დეკანოზი.

წყარო: ქართველ მოღვაწეთა ლექსიკონი, 1801-1952: ტ. I ა-დ / იოსებ იმედაშვილი.-თბ.,2018.-გვ.851; ხარაგაული და ხარაგაულელები: kharagauli.ucoz.com