გურამ კახიძე

დაბადების ადგილი: ქ. თბილისი.

დაამთავრა თბილისის სახელმწიფო უნივერსიტეტის ფიზიკა-ტექნიკის ფაკულტეტი 1955 წელს.

1951-1960წწ. მუ­შაობ­და სა­ქართველოს მეცნიერებათა აკადემიის ფიზიკის ინსტიტუტში კოსმოსური სხივების ლა­ბო­რატო­რია­ში სხვა­და­სხვა თანამდებობაზე; 1960-1962წწ. ამავე ლაბორატორიის გამგედ; მონაწილეობდა სამეცნიერო აპარატურის, კერძოდ, მაგნიტური სპექტრომეტრის შექმნაში იალბუზის კოსმოსური სხივების შემსწავლელი სადგურისთვის; 1963-1974წწ. მოსკოვის სა­ხელმწიფო უნივერსიტეტის ბირთვული ფიზიკის სამეცნიერო-კვლევით ინსტიტუტში (НИИЯФ МГУ) იკვლევდა მაღალი ენერგიების პირველად კოსმოსურ გა­მო­სხი­ვებას დედამიწის ხელოვნურ თანამგზავრებზე; 1970-1986წწ. შეიმუშავა, დაამზადა და გამოიკვლია სამეცნიერო აპარატურა, რომელიც დაიდგა "პროტონ" სერიის დედამიწის ხელოვნურ თანამგზავრებზე, მათ შორის წილადმუხტიანი კვარკების და მაგნიტური მონოპოლების არსებობის შესამოწმებლად; 1974-1993წწ. მუ­შა­ობ­და აბასთუმნის ასტროფიზიკურ ობსერვატორიაში მთავარ მეცნიერ თანამშრომლად; 1971-1978წწ. კოსმოსური კვლევის ინსტიტუტის (მოსკოვი) ლაბორატორიის გამგედ, სადაც "კოსმოს" სერიის დედამიწის ხელოვნურ თანამგზავრებზე იკვლევდნენ კოსმოსურ გამა-აფეთქებებისას წარმო­ქმნილ ახლადაღმო­ჩენილ გამო­სხი­ვე­ბას; 1979 წელს "კოსმოს-1106" დედამიწის ხელოვნურ თანამგზავრებზე შესრულებული გაზომვებით დადგინდა დედამიწის მაგნიტოსფეროში პოზიტრონული სარტყლის არსებობა; 1986 წელს მისი ხელმძღვანელობით შემუშავდა და დამზადდა სამეცნიერო აპარატურის კომპლექსი ორბიტალური სადგურისათვის МИР; 1992-2008წწ. მუშა­ობ­და რუსეთის მეცნიერებათა აკადემიის მართვის პრობლემების ინსტიტუტში მთავარ მეცნიერ თანამშრომლად; 1995 წლიდან მონაწილეობდა საერთაშორისო კოსმოსურ ორბიტალურ სადგურზე მიმდინარე კვლევებში; მისი სამეცნიერო კვლევები ეხება რენტგენისა და გამა-გამოსხივების კოსმოსური წყაროების შესწავლას, შესაბამისი აპარატურის შემუშავებასა და დამზადებას. ფიზიკა-მათემატიკის მეცნიერებათა დოქტორი (1993). 

წყარო: საქართველო: ენციკლოპედია: ტ. IV. -თბ., 2018.-გვ. 602