აკაკი მაქაცარია

დაბადების ადგილი: სოფელი ყულიშკარი, ზუგდიდის რაიონი.

დაამთავრა თბილისის სახელმწიფო უნივერსიტეტის გეოგრაფია-გეოლოგიის ფაკულტეტი გეომორფოლოგიის სპეციალობით 1954 წელს. 1963-1966წწ. სწავლობდა საქართველოს მეცნიერებათა აკადემიის ასპირანტურაში პროფ. ვ. ზენკოვიჩის ხელმძღვანელობით. 

1967-1986წწ. მეცნიერულ მუშაობას ეწეოდა საქართველოს ჰიდროტექნიკისა და მელიორაციის სამეცნიერო-კვლევით ინტიტუტში; 1986 წლიდან მუშაობდა ვახუშტი ბაგრატიონის სახელობის გეოგრაფიის ინსტიტუტში ეგზოდინამიკური პროცესების ლაბორატორიის ხემლძღვანელად. იკვლევდა ზღვის ნაპირების დინამიკასა და მორფოლოგიას, კერძოდ, შავი ზღვის საქართველოს სანაპიროებს და კოლხეთის სანაპიროების წყალქვეშა კანიონებს, სანაპირო ზონის მორეცხვისა და ფოთის ნავსადგურის შესასვლელი არხის დასილვის გამომწვევ მიზეზებს. სხვა მეცნიერებთან ერათად შეიმუშავა ბიჭვინთის კონცხისა და ბიჭვინთის საკურორტო კომპლექსის ზღვის შტორმებისაგან დაცვის ორიგინალური მეთოდი. გარდა ამისა, წლების მანძილზე იკვლევდა საქართველოს წყალსაცავებს, მათში მიმდინარე პროცესებს, ნაპირებისა და ფსკერის დინამიკას, მთის წყალსაცავების გავლენას ბუნებრივ გარემოზე, წყალსაცავებისა და ბუნებრივი გარემოს ურთიერთზეგავლენის აქტუალურ პრობლემებს. გამოქვეყნებული აქვს სამეცნიერო ნაშრომები. გეოგრაფიულ მეცნიერებათა კანდიდატი.

საკანდიდატო დისერტაციის თემა - "ბუნებრივ გარემოზე მთის წყალსაცავების ზემოქმედების გამოკვლევა", დაიცვა 1985 წელს.

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.188