ივანე კვესიტაძე

დაბადების ადგილი: სოფელი რკვია, ახლანდელი ზესტაფონის მუნიციპალიტეტი.

დაამთავრა ქ. ერევნის სავეტერინარო ინსტიტუტი 1932 წელს.

სხვადასხვა დროს იყო საქართველოს ექსპერიმენტული ვეტერინარიისა და საქართველოს ზოოტექნიკურ-სავეტერინარო ინსტიტუტებში არსებული მსხვილფეხა რქოსანი პირუტყვისა და ცხე­ნის დაავადებათა შემსწავლელი, ასევე ეპიზოოტოლოგიური განყოფილებებისა და ეპიზოოტოლოგიის კათედრის გამგე. 1939-1944წწ. მუშაობდა საქართველოს სოფლის მეურნეობის სამინისტროს სავეტერინარო სამმართველოს უფროსად; 1944-1948წწ. იყო სოფლის მეურნეობის მინისტრის მოადგილე; 1949-1956წწ. – ზოოტექნიკურ-სავეტერინარო, ხოლო 1946-1956წწ. – მეცხოველეობის და ვეტერინარის სამეცნიერო-კვლევითი ინსტიტუტების დირექტორი; მისი სამეცნიერო შრომები ეძღვნება სასოფლო-სამეურნეო ცხოველთა ინფექციური დაავადებების შესწავლის და მათ წინააღმდეგ ბრძოლის ღონისძიებათა შემუშავების პრობლემებს; მან სსრკ-ში პირველად (თანაავტორებთან ერთად), შეისწავლა და წარმოებაში დანერგა ბაქტერიოფაგი, როგორც ხბოების პარატიფისა და კოლიბაქტერიოზის წინააღმდეგ ბრძოლის საშუალება. ამ პერიოდში ის  თანამშრომლობდა რ. კოხის ლაბორატორიასთან; XX ს. 40-იანი წლების ბოლოს შექმნა ნახევრად თხიერი ფორმოლვაქცინა, რომელიც წარმატებით გამოიყენეს იმ დროისათვის საქარ­თველოში გავრცელებული ცხვრის ინფექციური აგალაქტიის წინააღმდეგ; ეწეოდა სამეცნიერო-პედაგოგიურ მოღვაწეობას; მან, თანაავტორებთან ერთად, გამოსცა ეპიზოოტოლოგიის (1951) და კერძო ეპიზოოტოლოგიის (1960) სახელმძღვანელოები. ავტორია მრავალი სამეცნიერო ნაშრომისა; მიღებული აქვს სა­ხელმწიფო ჯილდოები. ვეტერინარიის მეცნიერების ერთ-ერთი ფუძემდებელი საქართველოში. ვეტერინარიის მეცნიერებათა დოქტორი (1947), პროფესორი (1948).

წყარო: საქართველო: ენციკლოპედია: ტ. IV. -თბ., 2018.-გვ. 665

• კერძო ეპიზოოტოლოგია : სახელმძღვ. ვეტერ. ფაკ-ტის სტუდ. და ვეტერინარი ექიმებისათვის (თანაავტორი). - თბილისი, ცოდნა1960, 1960. - 384გვ.
• ბაქტერიოფაგის გამოყენება ხბოს პარატიფისა და კოლიბაცილიოზის წინააღმდეგ (ავტორი). - თბილისი, სახელგამი, 1952. - 132გვ.
• ეპიზოოტოლოგია : სახელმძღვანელო ტექნიკუმებისათვის (თანაავტორი). - თბილისი, სახელგამი, 1950. - 436გვ.
• ღორების ავადმყოფობა და მასთან ბრძოლა (ავტორი). - ტფილისი, სახელგამის სას.-სამ. სექტორი, 1935. - 46გვ.
• შინაური ცხოველების მოზარდის ინფექციური დაავადებები (ავტორი). - თბილისი, სახელგამი. - 211გვ.