გიორგი ცაგარელი

დაბადების ადგილი: ქ. თბილისი.

დაამთავრა თბილისის სახელმწიფო პედაგოგიური ინსტიტუტის გეოგრაფია-გეოლოგიის ფაკულტეტი გეოგრაფიის მასწავლებლის კვალიფიკაციით 1970 წელს; 1970-1973წწ. ასპირანტურის კურსი გაიარა ვახუშტი ბაგრატიონის სახელობის გეოგრაფიის ინსტიტუტში ეკონომიკური გეოგრაფიის განყოფილებაში.

1973-1977წწ. მუშაობდა ვახუშტი ბაგრატიონის სახელობის გეოგრაფიის ინსტიტუტში უფროს ლაბორანტად, შემდეგ უმცროს მეცნიერ-თანამშრომლად; 1977 წლიდან მუშაობდა თბილისის სახელმწიფო უნივერსიტეტის ეკონომიკური და სოციალური გეოგრაფიის კათედრაზე დოცენტის თანამდებობაზე; 1988-1992წწ. ამავე კათედრის გამგე იყო; 1993-1996წწ. მსახურობდა აშშ-ში საქართველოს სავაჭრო-ეკონომიკურ წარმომადგენლად; 1997 წლიდან ხელმძღვანელობს ევრო-აზიის სატრანსპორტო დერეფნის საინვესტიციო ცენტრს. არის მსოფლიო ბანკის ტრანსპორტისა და კომუნიკაციების სფეროების პროექტების კოორდინატორი; 1980-1992წწ. რამდენჯერმე იმყოფებოდა საზღვარგარეთ სამეცნიერო სტაჟირებასა და მივლინებაში, მათ შორის, ხანგრძლივად ლონდონის უნივერსიტეტის ეკონომიკური და პოლიტიკური მეცნიერებების სკოლაში, ლოძისა და ბრატისლავის უნივერსიტეტებში, აშშ-ში, შვედეთისა და ინდოეთის უნივერსიტეტებში და სხვ. გამოქვეყნებული აქვს 60-ზე მეტი სამეცნიერო ნაშრომი. მათ შორის, არის კოლექტიური მონოგრაფიების ავტორი. არჩეულია უცხოეთის სამეცნიერო საზოგადოებების წევრად. გეოგრაფიულ მეცნიერებათა კანდიდატი, დოცენტი (1980).

საკანდიდატო დისერტაციის თემა - "საქართველოს შავიზღვისპირა რაიონების სუბტროპიკული აგრარულ-სამრეწველო კომპლექსის ეკონომიკურ-გეოგრაფიული პრობლემები", დაიცვა 1977 წელს.

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.283-284; წიგნი ღირსებისა: ტ. 5/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2003. - გვ.214

• 2000 - ღირსების ორდენი