რომან მახარაძე

დაბადების ადგილი: სოფელი სამება, ჩოხატაურის რაიონი.

დაამთავრა თბილისის სახელმწიფო სამხატვრო აკადემია 1955 წელს (პედაგოგები: მოსე თოიძე, ალექსანდრე ციმაკურიძე, კორნელი სანაძე). 

მისი სადიპლომო ნამუშევარი იყო "საბავშვო ბაღი" (ხელმძღვანელი კორნელი სანაძე). 1958–1966წწ. მუშაობდა კინოსტუდია "ქართულ ფილმში" დამდგმელ მხატვრად; გააფორმა ხუთი მხატვრული ფილმი; 1966-1968წწ. საქართველოს ტელესტუდიის დამდგმელი მხატვარი; 1968–1978წწ. გამომცემლობა "საბჭოთა საქართველოს" უფროსი მხატვრული რედაქტორი; 1978-1982წწ. გამომცემლობა "ხელოვნების" უფროსი მხატვრული რედაქტორი; 1982 წლიდან მუშაობდა ქართულ ენციკლოპედიაში უფროს მხატვრულ რედაქტორად; გაფორმებული აქვს ათეულობით წიგნი, რომელთაგან რამდენიმე აღინიშნა ჯილდოთი; წარმატებული იყო მისი პერსონალური გამოფენა, რომელიც თბილისში 1985 წელს, ქართული ენციკლოპედიის გამომცემლობის შენობაში გაიმართა; გამოფენამ თავისებურად შეაჯამა რომან მახარაძის შემოქმედება როგორც ფერწერის, ისე წიგნის გრაფიკის დარგში; აღსანიშნავია მისი მონაწილეობა აკვარელის გამოფენაზე გერმანიის ფედერაციულ რესპუბლიკაში; მისი ნამუშევრები დაცულია შალვა ამირანაშვილის სახელობის ხელოვნების მუზეუმში, რამდენიმე სურათი მისი უწმინდესობის, საქართველოს კათოლიკოს პატრიარქის, ილია II-ის პირადი საკუთრებაა, ასევე ბევრია წარმოდგენილი კერძო კოლექციებში. ფერმწერი, გრაფიკოსი, ილუსტრატორი, კინოს მხატვარი.

• საქართველოს მხატვართა კავშირი, წევრი (1967-)