ნოდარ წივწივაძე

დაბადების ადგილი: ქ. თბილისი.

დაამთავრა თბილისის სახელმწიფო უნივერსიტეტის გეოგრაფია-გეოლოგიის ფაკულტეტი ოკეანოლოგიის სპეციალობით 1972 წელს.

1972-1974წწ. მუშაობდა თბილისის სახელმწიფო უნივერსიტეტის გეოგრაფია-გეოლოგიის ფაკულტეტის მეტეოროლოგია-კლიმატოლოგიის კათედრაზე უმცროს მეცნიერ-თანამშრომლად; 1974-1978წწ. სსრკ ტრანსპორტის სამინისტროს სამეცნიერო-კვლევით ინსტიტუტის ზღვის ნაპირდამცავი ნაგებობების შავი ზღვის განყოფილებაში ინჟინრად, უფროს ინჟინრად, უმცროს მეცნიერ-თანამშრომლად. მონაწილეობდა რიგი ობიექტების პროექტირებაში (ბამი-ბაიკალის ტბის სანაპიროზე გამავალი დროებითი მაგისტრალები, ლენინგრადის დამბა მდ. ნევაზე, გრიგორიევსკის პორტი, ჩრდილოეთის ზღვაში დროებითი პორტ-თავშესაფარი, ბალტიის ზღვაზე თავისუფალი ხელოვნური პლაჟი, შავ ზღვაზე ნაპირდამცავი საშუალებები და სხვ.); 1984 წელს სტაჟირება გაიარა დიდ ბრიტანეთში; 1984 წლიდან თბილისის სახელმწიფო უნივერსიტეტის მეტეოროლოგია-კიმატოლოგიისა და ოკეანოლოგიის კათედრის დოცენტი. მისი სადისერტაციო ნაშრომი ეხება ზღვის სანაპირო ზოლის ჰიდროდინამიკისა და ნაპირდაცვის აქტუალურ საკითხებს. გამოქვეყნებული აქვს სამეცნიერო ნაშრომები, მათ შორის, უცხოეთის გამოცემებში; მონოგრაფია - "ტალღები დინებაზე", რომელიც ეხება ზღვის სანაპირო ზოლში მიმდინარე პროცესებს. მონაწილეობა აქვს მიღებული საერთაშორისო კონფერენციებში საინჟინრო ოკეანოლოგიის განხრით; 1982 წელს აირჩიეს მსოფლიო ოკეანის შემსწავლელი კომისიის ლითოდინამიკის სამუშაო ჯგუფის წევრად. მისი ხელმძღვანელობით თბილისის სახელმწიფო უნივერსიტეტის ბაზაზე ჩატარდა I საკავშირო კონფერენცია სანაპირო ზოლში ნატანის ტრანსპორტირების საკითხებზე. ტექნიკის აკადემიური დოქტორი.

საკანდიდატო დისერტაციის თემა - "ზღვის სანაპირო ზოლის ჰიდროდინამიკის ელემენტების გამოკვლევა", დაიცვა 1982 წელს (ქ. მოსკოვი).

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.297

• ზღვის ეკოლოგია : სახელმძღვ. (თანაავტორი). - თბილისი, თბილ. უნ-ტის გამ-ბა, 2009. - 239გვ.. - ISBN: 9789941131141