თომა ხარჩილავა

დაბადების ადგილი: სოფელი ჯგალი, წალენჯიხის რაიონი.

დაამთავრა თბილისის სახელმწიფო უნივერსიტეტის ფიზიკა-მათემატიკის ფაკულტეტი 1932 წელს.

მუშაობა დაიწყო თბილისის გეოფიზიკურ ობსერვატორიაში; 1933 წელს დანიშნეს წალენჯიხის პედაგოგიური ტექნიკუმის დირექტორად; 1934 წელს თბილისის გეოფიზიკურ ობსერვატორიაში ბრუნდება და მივლინებულ იქნა ქ. მოსკოვში ერთწლიან სინოპტიკურ კურსებზე; 1934-1941წწ. მუშაობდა საქართველოს ბათუმის ჰიდრომეტგანყოფილებაში ჯერ სინოპტიკოსად, შემდეგ უფროსად; 1941 წელს გადაიყვანეს სომხეთში სამუშაოდ; 1945 წელს ბრუნდება თბილისში და 1950-1953წწ. თბილისის ამინდის ბიუროს უფროსი ინჟინერ-სინოპტიკოსია; 1953-1956წწ. გრძელვადიანი პროგნოზების ჯგუფის უფროსი; 1956-1957წწ. თბილისის ამინდის ბიუროს უფროსი; 1957-1970წწ. ამიერკავკასიის რეგიონული ჰიდრომეტეოროლოგიურ კვლევით ინსტიტუტში მუშაობდა; 1970 წლიდან დაბრუნდა ამინდის ბიუროს გრძელვადიან განყოფილებაში. ეწეოდა სამეცნიერო სამუშოს. იკვლევდა თავსხმა ნალექების, ჭექა-ქუხილის, სეტყვის მოვლენების, ტემპერატურისა და ნალექების კლიმატურ და აეროსინოპტიკურ პირობებს, ამუშავებდა ამ მოვლენების პროგნოზების მეთოდიკას. გამოქვეყნებული აქვს 30-ზე მეტი სამეცნიერო ნაშრომი. გეოგრაფიულ მეცნიერებათა დოქტორი.

საკანდიდატო დისერტაციის თემა - "უხვი ნალექები დასავლეთ საქართველოში". დაიცვა 1965 წელს; სადოქტორო დისერტაციის თემა - "ჰაერის ტემპერატურის, სიცივისა და სითბოს ტალღების და ატმოსფერული ნალექების თვიური ჯამის პროგნოზირების მეთოდი ამიერკავკასიაში და დაღესტნის ასსრ", დაიცვა 1971 წელს.

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.305-306