ირაკლი ხომერიკი

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი ინჟინერ-ჰიდროლოგის სპეციალობით 1960 წელს.

1960-1986წწ. მუშაობდა საქართველოს ენერგეტიკის ინსტიტუტში უმცროს მეცნიერ-თანამშრომლად, უფროს მეცნიერ-თანამშრომლად, წყალსამეურნეო ანგარიშების სექტორის ხელმძღვანელად; 1986 წლიდან - თბილისის სახელმწიფო უნივერსიტეტის ჰიდროლოგიის კათედრის პროფესორად. გამოქვეყნებული აქვს 80-ზე მეტი სამეცნიერო ნაშრომი. 1994 წლიდან არის საქართველოს იუნესკოს საქმეთა კომისიის ოკეანოგრაფიული კომიტეტის თავმჯდომარე; 1997 წლიდან - თბილისის სახელმწიფო უნივერსიტეტის ოკეანოლოგიური კვლევის საერთაშორისო ცენტრის ხელმძღვანელი (იუნესკო); 1992 წლიდან საქართველოს პარლამენტის გარემოს დაცვის და ბუნებრივი რესურსების კომიტეტის ექსპერტ-კონსულტანტი; მსოფლიო მეტეოროლოგიური ორგანიზაციის ჰიდროლოგიური პრობლემების კოორდინატორი საქართველოში. ტექნიკურ მეცნიერებათა დოქტორი, პროფესორი (1989).

საკანდიდატო დისერტაციის თემა - "მარეგულირებელი წყალსაცავის მრავალწლიური მოცულობის ანგარიში ჩანადენის ციკლური რყევების გათვალისწინებით", დაიცვა 1965 წელს; სადოქტორო დისერტაციის თემა - "გაუმდინარი ზღვების დონეთა რეჟიმი (ანალიზი, კანონზომიერებანი, პროგნოზი)", დაიცვა 1981 წელს (ლენინგრადის სახელმწიფო ჰიდროლოგიური ინსტიტუტი).

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.312-313; წიგნი ღირსებისა: ტ. 5/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2003. - გვ.214

• საქართველოს გეოგრაფიული საზოგადოება, პრეზიდიუმის წევრი

• 2000 - ღირსების მედალი

• ზღვის ეკოლოგია : სახელმძღვ. (თანაავტორი). - თბილისი, თბილ. უნ-ტის გამ-ბა, 2009. - 239გვ.. - ISBN: 9789941131141
• წყლის რესურსების ბალანსური კვლევა : ლექციების კურსი ჰიდროლოგიისა და ჰიდროეკოლოგიის სპეც. სტუდ. (ავტორი). - თბილისი, თბილ. უნ-ტის გამ-ბა, 2003. - 94გვ.. - ISBN: 9992895888