გაბრიელ ბაჩულაშვილი

დაბადების ადგილი: სოფელი ზემო ალვანი, ახმეტის რაიონი.

დაამთავრა თბილისის სახელმწიფო უნივერსიტეტის ფილოსოფიის ფაკულტეტი; ასპირანტურაში სწავლობდა გამოჩენილი ქართველი ფილოსოფოსის სავლე წერეთლის ხელმძღვანელობით.

მუშაობდა საქართველოს მეცნიერებათა აკადემიის ფილოსოფიის ინსტიტუტში. მისი მეცნიერული კვლევის ძირითადი მიმართულება იყო დიალექტიკური ლოგიკა, რომლის პრობლემებს იგი ს. წერეთლის დიალექტიკურ-ლოგიკური თეორიის საფუძველზე ამუშავებდა. ჯერ კიდევ პირველ წიგნში, რომელიც მიძღვნილია კარლ მარქსის "კაპიტალში" წარმოდგენილი ფილოსოფიური კატეგორიების კავშირის გამოკვლევისადმი, საფუძვლიანად შესწავლილია ისტორიული და ლოგიკური მეთოდების ურთიერთობა და მათი როლი სპეციალურ-მეცნიერული კვლევის პროცესში, კატეგორიების ურთიერთ გადასვლა და, საერთოდ, ცნებათა გადასვლის ფორმები, კატეგორიების "წრებრუნვა", გარდაქმნა და ა.შ. განსაკუთრებული მნიშვნელობა აქვს მის მეორე (უკანასკნელ) წიგნს, რომელიც მისი გარდაცვალების შემდეგ გამოქვეყნდა. მასში განხილულია კატეგორიების დიალექტიკა გნოსეოლოგიური ლოგიკის თვალსაზრისით. აქ ავტორი აკონკრეტებს და აღრმავებს სავლე წერეთლის კონცეფციას გნოსეოლოგიური ლოგიკის შესახებ, რომლის საფუძვლად კატეგორიების დიალექტიკა ძევს. მისი მეცნიერული კვლევის ყურადღების ცენტრში იყო აგრეთვე ზოგადისა და უზოგადესის კატეგორიების ბუნება. მისი აზრით, ზოგადისა და ერთეულის კატეგორიების ერთიანობა კონკრეტულობას ქმნის. ზოგადის შემეცნება აბსტრაქტულ აზროვნებას წარმოადგენს, ხოლო უზოგადესის კატეგორია ფილოსოფიური შემეცნების საფუძვლად ძევს. იგი იკვლევდა აგრეთვე ფილოსოფიური კატეგორიების ბუნებას, მათ როლს მეცნიერულ შემეცნებაში; განსაკუთრებით დაინტერესებული იყო არსების კატეგორიის კვლევით. მთელი ეს მუშაობა დიალექტიკური ლოგიკის, როგორც ფილოსოფიური მეცნიერებისა და უმაღლესი ლოგიკის დასაბუთებას ემსახურებოდა. გამოქვეყნებული აქვს მრავალი სამეცნიერო სტატია. ფილოსოფიის მეცნიერებათა კანდიდატი (1961).

წყარო: ქართველი ფილოსოფოსები: IV საუკუნიდან XX საუკუნის ჩათვლით: ცნობარი.-ბათუმი, 2004. -გვ.31-32

• კატეგორიების დიალექტიკა როგორც გნოსეოლოგიური ლოგიკა (ავტორი). - თბილისი, მეცნიერება, 1979. - 202გვ.
• კატეგორიების კავშირი კარლ მარქსის "კაპიტალში" (ავტორი). - თბილისი, საქ. სსრ მეცნ. აკად. გამ-ბა , 1961. - 154გვ.