ნიკოლოზ ურუშაძე

დაბადების ადგილი: ქ. ოზურგეთი.

დაამთავრა ქუთაისის კლასიკური გიმნაზია.

1917 წელს მსახურობდა ქართულ მეოთხე ქვეითთა პოლკში, რომელიც ოსმალებისგან იცავდა ოზურგეთსა და მის მიდამოებს. დამოუკიდებლობის გამოცხადების ამბავი ნიკოლოზ ურუშაძემ  თავის ათასეულში, სოფელ ბახვში შეიტყო. იგი 1926 წელს სპეციალური დავალებით მივლინებულ იქნა პარიზში, როგორც საქართველოს სოციალისტ–ფედერალისტთა პარტიის წარმომადგენელი უცხოეთში. აქ ის შეხვდა სამსონ ფირცხალავას, პარიზში გამომავალ უცხოეთში მყოფ სოციალისტ–ფედერალისტების კომიტეტის პერიოდულ ორგანო "სახალხო საქმის" ( 1826–1935) რედაქტორს და 1927 წლიდან დაიწყო თანამშრომლობა ამ ჟურნალში. მისი პირველი სტატია – "ჩვენი პარტია და ეროვნული მთლიანობის იდეა", გამოქვეყნდა "სახალხო საქმის" 1927 წლის თებერვლის ნომერში. ნიკოლოზ ურუშაძის წერილები მუდმივად იბეჭდებოდა ქართული ემიგრანტული პრესის ფურცლებზე. მასალები მის შესახებ გამოქვეყნებულია: "ინტერვიუ: ნიკო ურუშაძე" (რადიო "თავისუფლება", მიუნხენი); ქართული რედაქცია: კრებული (რეპორტაჟები, ინტერვიუები, კორესპონდენციები) II, ლევილის ქართული მამულის ბიბ-კა. მიუნხენი, 1977, გვ. 119–124); "ნიკო ურუშაძის გარდაცვალება" ("მებრძოლი საქართველო", ქართული ეროვნული საბჭოს ორგანო, პარიზი, 2000, 26 მაისი, N27(45), გვ.56-59). ემიგრანტ სევერიან ურუშაძის ძმა, ქართველი ემიგრანტი. 

წყარო: ქართული ემიგრანტული ჟურნალისტიკის ისტორია: ტ. 1/გურამ შარაძე. - თბ., 2001. - გვ. 379; el.ge