უჩა დადიანი

დაბადების ადგილი: ზუგდიდის მაზრა. 
დაამთავრა თბილისის კადეტთა კორპუსი 1894 წელს, შემდეგ პაჟთა კორპუსი პეტერბურგში 1897 წელს.

სამხედრო სამსახური დაიწყო ხორუნჟის ჩინით ყუბანის კაზაკთა ჯარის ხოპიორის კაზაკთა 1-ლ პოლკში; 1899 წლიდან, როგორც ლაიბგვარდიის ყუბანის კაზაკთა 1-ლი ასეულის ოფიცერი, ირიცხებოდა მისი უდიდებულესობის საკუთარ კონვოიში. დაახლოებული იყო ნიკოლოზ II-ის ოჯახთან; 1911-1914წწ. დადიანი გასამართლებული იყო ბაღდათის მეტყევეობის ჩინოსნის, თავად ალექსანდრე (ციოყ) დადიშქელიანის მკვლელობის (1910 წლის 8 იანვარი) საქმესთან დაკავშირებით; სასამართლომ უჩა დადიანი დამნაშავედ ცნო და 20-წლიანი კატორღა მიუსაჯა. განაჩენის სენატში გასაჩივრებისას მის ინტერესებს ცნობილი ადვოკატი ნიკოლაი კარაბჩევსკი იცავდა. საბოლოოდ, სენატმა უჩა დადიანი უდანაშაულოდ ცნო; I მსოფლიო ომის დროს უჩა დადიანი იყო ყუბანის კაზაკთა ჯარის ეკატერინოდარის მე-2 პოლკის ესაული და მიმაგრებული იყო 1-ლი კავკასიური ("ველური") ადგილობრივთა ცხენოსანი დივიზიის ჩეჩნურ ცხენოსან პოლკს; თავი გამოიჩინა ბრძოლებში კარპატებში; იმავე წლის თებერვლის რევოლუციის შემდეგ საქართველოში დაბრუნდა; 1918-1921წწ. მსახურობდა საქართველოს სახალხო გვარდიაში, მონაწილეობდა ბოლშევიკური არეულობის ლიკვიდაციაში სამეგრელოსა და აფხაზეთში; 1921 წელს საქართველოს გასაბჭოების შემდეგ ემიგრაციაში წავიდა კონსტანტინეპოლში, სადაც საგზაო შემთხვევას ემსხვერპლა მისი მეუღლე ბარბარე. 1923 წელს გადასახლდა ამერიკის შეერთებულ შტატებში; მუშაობდა მაჩაბლის პარფიუმერულ ფირმაში. იყო ქართული და ჩერქეზული სათვისტომოების წევრი. მონაწილეობდა საჭადრაკო ტურნირებში; რუსეთის იმპერატორის ნიკოლოზ II-ის კონვოის ოფიცერი, I მსოფლიო ომის მონაწილე. 1921 წლიდან ემიგრანტი.

წყარო: კანვოი : რუსეთის იმპერატორთა ქართველი მცველები / ირაკლი მახარაძე.-თბ.,2018; nobility.pro; ria1914.info

• 1916 - წმინდა გიორგის იარაღი
• 1916 - წმინდა გიორგის IV ხარისხის ორდენი