მიხეილ სტამბოლიშვილი

დაბადების ადგილი: სოფელი ლეღვა, ქობულეთის რაიონი.

დაამთავრა აჭარის პედაგოგიური სასწავლებელი 1928 წელს; 1931 წლიდან სწავლა გააგრძელა თბილისის სახელმწიფო უნივერსიტეტის სოციალურ-ეკონომიკურ ფაკულტეტზე ფილოსოფიის სპეციალობით; მომდევნო წლიდან სასწავლებლად გაიგზავნა მოსკოვში ფილოსოფიის, ისტორიისა და ლიტერატურის ინსტიტუტის ფილოსოფიის ფაკულტეტის მეორე კურსზე.

1936 წელს დაბრუნდა ბათუმში და ბათუმის შოთა რუსთაველის სახელობის სამასწავლებლო ინსტიტუტის დიალექტიკური და ისტორიული მატერიალიზმის მასწავლებლად დაიწყო მუშაობა; 1938 წლიდან სამასწავლებლო ინსტიტუტის მარქსიზმ-ლენინიზმის კათედრის გამგედ დაინიშნა, პარალელურად, 1941-1943წწ. სამასწავლებლო ინსტიტუტის დირექტორი იყო. მისი მეცნიერული კვლევა-ძიების მთავარ სფეროს შეადგენდა საზოგადოების განვითარების კანონზომიერება, საწარმოო ძალებისა და წარმოებითი ურთიერთობების მიმართულებანი, შესაძლებლობისა და სინამდვილის კატეგორიები. გამოქვეყნებული ჰქონდა 60 სამეცნიერო ნაშრომი, აქედან 3 მონოგრაფია. მიღებული აქვს სახელმწიფო ჯილდოები. მიხეილ სტამბოლიშვილის საპატივცემულოდ 2007-2008 სასწავლო წელს უნივერსიტეტის პირველი კორპუსის 42-ე აუდიტორიას ეწოდა მიხეილ სტამბოლიშვილის კაბინეტი. ფილოსოფიის მეცნიერებათა დოქტორი (1968), პროფესორი.

საკანდიდატო დისერტაციის თემა - "შესაძლებლობისა და სინამდვილის საკითხი ფილოსოფიაში", დაიცვა 1943 წელს; სადოქტორო დისერტაცია დაიცვა 1968 წელს (კიევის სახელმწიფო უნივერსიტეტი). 

წყარო: ქართველი ფილოსოფოსები: IV საუკუნიდან XX საუკუნის ჩათვლით: ცნობარი.-ბათუმი, 2004. -გვ.152-153; ბათუმის შოთა რუსთაველის სახელმწიფო უნივერსიტეტი: bsu.edu.ge

• 1950 - საპატიო ნიშნის ორდენი

• საწარმოო ძალებისა და წარმოებით ურთიერთობათა განვითარების დიალექტიკა სოციალისტურ საზოგადოებაში (ავტორი). - ბათუმი, [აჭარის] სახელგამი, 1962. - 207გვ.