ვახტანგ გომელაური

დაბადების ადგილი: სოფელი მირზაანი, დედოფლისწყაროს რაიონი.

1926 წელს შევიდა თბილისის სახელმწიფო უნივერსიტეტის აგრონომიული ფაკულტეტის სატყეო სპეციალობაზე; 1930 წელს დაამთავრა თბილისის სატყეო ტექნიკური ინსტიტუტის სატყეო-სამეურნეო ფაკულტეტი.

1933 წელს მუშაობა დაიწყო თბილისის სატყეო ტექნიკურ ინსტიტუტში ასისტენტად; მუშაობდა სხვადასხვა თანამდებობაზე საქართველოს სატყეო მეურნეობის კომისარიატში ტყის მოვლის განხრით; 1935 წელს დაინიშნა გორის რაიონის მთავარ მეტყევედ, 1937 წელს კი გადაიყვანეს თბილისში, საქართველოს სატყეო მრეწველობის კომისარიატში. 1941 წელს გაიწვიეს სამხედრო სამსახურში, მონაწილეობდა მეორე მსოფლიო ომში. იბრძოდა ყირიმში, სევასტოპოლის დაცვის დროს მძიმედ დაიჭრა. 1942 წლის ბოლოს დაინიშნა საქართველოს სატყეო მრეწველობის კომისარიატის საკურორტო ტყეების სამმართველოს უფროსად, ხოლო 1946 წლიდან საქართველოს სსრ მინისტრთა საბჭოსთან არსებულ ნაკრძალთა მთავარი სამმართველოს უფროსის მოადგილედ სამეცნიერო-კვლევით დარგში. 1952-1962წწ. იყო საქართველოს სსრ მინისტრთა საბჭოს სატყეო მეურნეობის სახელმწიფო კომიტეტის  ტყის კულტურების სამმართველოს უფროსი, ხოლო 1961 წლიდან სატყეო კომიტეტის მთავარი მეტყევე, ტყით სარგებლობისა და ტყეთმოწყობის  სამმართველოს უფროსი. მიღებული ჰქონდა სახელმწიფო ჯილდოები, მათ შორის საქართველოს სსრ უმაღლესი საბჭოს პრეზიდიუმის საპატიო სიგელი. მეტყევე.

წყარო: კახეთის გამოჩენილი ადამიანები/ოთარ ნაცარაშვილი.-თბ.,2001.-გვ.335

• საქართველოს სსრ მინისტრთა საბჭოს სატყეო მეურნეობის სახელმწიფო კოლეგია, წევრი

• 1963 - საქართველოს დამსახურებული მეტყევე