შალვა ბარჯაძე

ზოოლოგი (ენტომოლოგი, ბიოსპელეოლოგი), ბიოლოგიის მეცნიერებათა კანდიდატი (2005), დოქტორი.

დაამთავრა თბილისის სახელმწიფო უნივერსიტეტის ბიოლოგიის ფაკულტეტის ბაკალავრიატი ბიოლოგიის სპეციალობით 2002 წელს; 2004 წელს ამავე უნივერსიტეტის ბიოლოგიის ფაკულტეტის მაგისტრატურა ეკოლოგიის სპეციალობით.

2001 წლიდან მუშაობს ზოოლოგიის ინსტიტუტში; 2016 წელს  გახდა უხერხემლო ცხოველთა შემსწავლელი სამეცნიერო-კვლევითი ჯგუფის ხელმძღვანელი; 2013–2017წწ. საქართველოს აგრარულ უნივერსიტეტში იყო ასისტენტ-პროფესორი ენტომოლოგიის მიმართულებით; 2017–2019წწ. ასისტენტ-პროფესორი; 2019 წლიდან არის ასოცირებული პროფესორი უხერხემლოთა ზოოლოგიის მიმართულებით ილიას სახელმწიფო უნივერსიტეტში; 2016 წლიდან არის ბუნების დაცვის საერთაშორისო კავშირის (IUCN) მღვიმეების უხერხემლო ცხოველთა სპეციალისტთა ჯგუფის წევრი (IUCN SSC Cave Invertebrate Specialist Group member); მისი სამეცნიერო ინტერესის სფეროებია: ბუგრებისა (Hemiptera, Aphidomorpha) და ბოლოფეხიანების (Collembola) ტაქსონომია, ბიომრავალფეროვნება და ფილოგენეზი; მღვიმეების უხერხემლო ცხოველთა ბიოლოგია, ეკოლოგია და კონსერვაცია. გამოქვეყნებული აქვს 120 სამეცნიერო პუბლიკაცია. 

საკანდიდატო დისერტაციის თემა - "მდინარეების ძამას, ტანასა და თეძმის ხეობების ბუგრების (Hemiptera: Aphidoidea) ფაუნა და ეკოლოგია", დაიცვა 2005 წელს.

წყარო: ილიას სახელმწიფო უნივერსიტეტი: faculty.iliauni.edu.ge; cbg.iliauni.edu.ge