ჯონდი ჯოჯუა

დაბადების ადგილი: ქ. ფოთი.

დაამთავრა ბათუმის საზღვაოსნო სასწავლებელი შტურმან - გემთწამყვანის სპეციალობით 1957 წელს; მოსკოვის კვების მრეწველობის ინსტიტუტი თევზჭერის დაგეგმარების ეკონომიკის სპეციალობით 1980 წელს.

ზღვაში შრომითი საქმიანობა თავდაპირველად რიგით მეზღვაურად - მატროსად დაიწყო; 1959-1962 წწ. შორეული ნაოსნობის შტურმანად, კაპიტნის მესამე, მეორე და უფროს თანაშემწედ ცურავდა სსრკ ჩრდილოეთის მურმანსკის ფლოტილიის თევზსაჭერ გემებზე; 1962 წელს საქართველოში, ფოთის საოკეანო თევზჭერის სამმართველოს დაარსებისთანავე უკვე გამოცდილი ზღვაოსანი სამშობლოში ბრუნდება და ჯერ გერმანიაში აგებულ ტრაულერ «შოთა რუსთაველი»-ს იმ დროს უკვე სახელმოხვეჭილ კაპიტან აბესალომ ზენაიშვილის უფროსი თანაშემწე ხდება, 1964 წელს კი 28 წლის ასაკში თავად ინიშნება საოკეანო ტრაულერ «ფოთი»-ს კაპიტან-დირექტორად; 1967 წელს გერმანიის ნავსადგურ შტრალსუნდის გემთსაშენში ჯონდი ჯოჯუამ მიიღო და ექსპლუატაციაში გაუშვა ახალი საოკეანო ტრაულერი «სალხინო», რომლის კაპიტანიც იყო წლების მანძილზე, მოგვიანებით კი ტრაულერებს: «საქართველოს» (1972), «იმერეთსა» (1981) და «ბაზალეთს» (1983) მეთაურობდა; 1983 წლიდან იგი ნაპირზე განაგრძობს საქმიანობას, შავი ზღვის თევზჭერის ინსპექციაში; 1993-2006 წწ. ფოთის ნავსადგურის კაპიტნის მოადგილის მოვალეობას ასრულებდა დამსახურებულ პენსიაზე გასვლამდე; პენსიაზე გასვლის შემდეგ პედაგოგიურ საქმიანობასაც ეწეოდა და საკუთარ გამოცდილებას უზიარებდა ახალგაზრდებს ბათუმის ნავიგაციის უნივერსიტეტის ფოთის ფილიალში. შორეული ნაოსნობის კაპიტანი.

წყარო: პაატა ტაბაღუას საავტორო გვერდი: "საქართველო საზღვაო ქვეყანაა": facebook.com

• 2014 - ფოთის საპატიო მოქალაქე
• 2011 - ღირსების ორდენი
  საზღვაო დარგის განვითარებაში გაწეული განსაკუთრებული და ხანგრძლივი საქმიანობისთვის