დავით ჭელიძე

დაბადების ადგილი: ქ. თბილისი.

1989-1992წწ. სწავლობდა საქართველოს პოლიტექნიკურ ინსტიტუტში. სტუდენტთა სამეცნიერო-ტექნიკურ კონფერენციებში გამორჩეული მოხსენებებისათვის მიენიჭა აკადემიკოს დ. თავხელიძის სახელობის სტიპენდია; საუკეთესო სტატიებისათვის მათემატიკაში, ფიზიკაში, თეორიულ მექანიკაში, მანქანათმშენებლობაში და მექანიზმების თეორიაში მიღებული აქვს წარჩინების დიპლომები და ჯილდოები; სტუდენტთა საპრეზიდენტო გაცვლითი პროგრამით 1991-1992წწ. მივლინებული იქნა ამერიკის შეერთებულ შტატებში, სადაც ჩაირიცხა სამხრეთ ილინოისის უნივერსიტეტში; აქ მან 1995 წელს მოიპოვა მაგისტრის ხარისხი მანქანათმშენებლობაში.

2000 წლიდან იყო პენსილვანიის სახელმწიფო კოლეჯის მთავარი ინჟინერი; იმავე წლიდან მუშაობს როდ აილენდის უნივერსიტეტის მანქანათმშენებლობისა და გამოყენებითი მექანიკის კათედრაზე: 2000-2005წწ. - ასისტენტი პროფესორი; 2005-2009წწ. - ასოცირებული პროფესორი; 2009 წლიდან - პროფესორი. მისი სამეცნიერო კვლევები ეხება ანალიტიკურ და ექსპერიმენტალურ არაწრფივ დინამიკას, მექანიკის მტყუნებას, მოდალურ ტესტირებასა და ანალიზს, საინჟინრო სისტემების დინამიკასა და სტაბილურობას; აქცენტი გადატანილია ცოდნის სინთეზზე ისეთი სფეროებიდან, როგორიცაა დინამიკური და სტოქასტიკური სისტემები; წრფივი და არაწრფივი დროითი რიგების ანალიზი; საინჟინრო, გეოგრაფიული და ბიოლოგიური სისტემების იდენტიფიკაციის, დიაგნოსტირებისა და პროგნოზირების ინოვაციური ტექნილოგიების შექმნისა და იმპლემენტაციის თეორიის შეფასება და ფილტრაცია. საინჟინრო და მექანიკის მეცნიერებების დოქტორი (აშშ-ის პენსილვანიის სახელმწიფო უნივერსიტეტი - 2000წ.), პროფესორი (2009).

წყარო: საქართველოს მათემატიკოსები და მექანიკოსები: ბიოგრაფიული ცნობარი/ნოდარ მახვილაძე. -თბ., 2016. -გვ.301-302