გიორგი ჩალაძე

დაბადების ადგილი: სოფელი ურავი, ამბროლაურის მუნიციპალიტეტი.
დაამთავრა პედაგოგიური სასწავლებელი ამბროლაურის რაიონში; თბილისის სამხატვრო აკადემიის ქანდაკების ფაკულტეტი 1957 წელს. 
მასწავლებლად განაწესეს ქვემო სვანეთის რაიონში; აქტიურად მონაწილეობს რესპუბლიკურ და საკავშირო გამოფენებში; ცხოვრება და მოღვაწეობა განაგრძო რუსთავში. აქ მან შეკრიბა ადგილობრივი მხატვრების მცირე ჯგუფი და დააარსა მხატვართა გაერთიანება; 1973 წელს გაიმართა რუსთაველ მხატვართა პირველი გამოფენა; 30 წელი ხელმძღვანელობდა ამ ორგანიზაციას, რამაც დიდი როლი შეიტანა ახალგაზრდა ქალაქის კულტურულ ცხოვრებაში; მის დიდ დამსახურებად უნდა ჩაითვალოს რუსთავის სამხატვრო სკოლის დაარსება; ამ სკოლის დამსახურებაა ის, რომ დღეს რუსთავს ასზე მეტი მხატვარი ჰყავს და მათ შორის არიან დამსახურებული მხატვრები; მისი შემოქმედება ასახულია მრავალ გამოცემაში: კატალოგებში, წიგნებში, ჟურნალებში. მათ შორის ერთ-ერთია გერმანიაში გამოცემული ენციკლეპოდია "ყველა ქვეყნის და ყველა დროის ხელოვანი" - სადაც საქართველოდან შესულია მხოლოდ ოთხი მხატვარი, კატალოგის №15 ტომში ფიგურირებს გიორგი ჩალაძის შესახებ მონაცემები; მან მწერლობაშიც მოსინჯა თავისი შესაძლებლობები და გამოსცა ოთხი წიგნი; არის მრავალი დიპლომისა და სიგელის მფლობელი; მის მიერ შესრულებული ქანდაკებები დგას საქართველოს სხვადასხვა ქალაქებში და აგრეთვე რუსეთსა და უკრაინის ტერიტორიაზე; პერსონალური გამოფენები: ხელოვნების მუზეუმი (თბილისი), თბილისის სახელმწიფო უნივერსიტეტი, მხატვრის სახლი, გალერეა "ქარვასლა", ქ. ამბროლაური, შვედეთი, საბერძნეთი, გერმანია და სხვა; მისი ნამუშევრები ინახება სამხატვრო ფონდის საცავში, მუზეუმსა და მრავალ კერძო კოლექციაში; ცნობილია როგორც მოქანდაკე. ფერწერაში მუშაობა დაიწყო მოგვიანებით. ალბათ ამან განაპირობა, რომ მისი ფერწერა სრულიად განსხვავებული ხელწერის და სტილისაა; სპეციალისტების აზრით, ნამუშევრები ქანდაკებისა და ფერწერის ურთიერთშერწყმაა და მთლიანობაში წარმოადგენს ფორმის, მოცულობის და ფერის სინთეზს; ნაყოფიერი გამოდგა მისი მოღვაწეობა საბერძნეთში. იქ შეიქმნა მრავალი დიდი ზომის პანოები: არგონავტების, ალექსანდრე მაკედონელისა და სხვა მრავალ თემაზე. აგრეთვე გააფორმა სპექტაკლი თეატრში, რამაც ქ. სალონიკში აღიარება მოუტანა. უკრაინელი პოეტის ტარას შევჩენკოს პორტრეტისთვის მიღებული აქვს საქართველო - უკრაინის მეგობრობის მედალი.

წყარო: გაზეთი "თბილისის უნივერსიტეტი": newspaper.tsu.ge; წიგნი ღირსებისა: ტ. 4/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2002. - გვ.302

• საქართველოს მხატვართა კავშირი, წევრი
• ფაზისის მეცნიერებათა აკადემია, წევრი

• 1999 - ღირსების ორდენი
  ქართული კულტურის განვითარებაში, მის პოპულარიზაციაში, კულტურულ - საგანმანათლებლო საქმიანობაში შეტანილი დიდი პირადი დიდი წვლილისათვის, ნაყოფიერი შემოქმედებითი, პედაგოგიური და საზოგადოებრივი მოღვაწეობისათვის
• იაკობ გოგებაშვილის სახელობის მედალი
  პედაგოგიური მიღწევებისთვის
• რუსთავის საპატიო მოქალაქე
• საქართველოს დამსახურებული მხატვარი