ნიკო ბექაური

დაბადების ადგილი: სოფელი ფასანაური, დუშეთის რაიონი.

სწავლობდა თბილისის ტექნოლოგიურ ინსტიტუტში ქიმიური ტექნოლოგიის ფაკულტეტზე; მესამე კურსიდან გადაყვანილ იქნა ქ. ლენინგრადის ტექნოლოგიურ ინსტიტუტში; 1939 წელს, ინსტიტუტის დამთავრების შემდეგ, დატოვეს ასპირანტურაში ნავთობქიმიური ტექნოლოგიის სპეციალობით.

1940 წელს გაიწვიეს საბჭოთა არმიის რიგებში; 1943 წელს მძიმედ დაიჭრა და დემობილიზებულ იქნა; 1947 წელს დაიცვა დისერტაციას ქ. ლენინგრადში. იმავე წელს დაბრუნდა საქართველოში და 1961 წლამდე მუშობდა საქართველოს მეცნიერებათა აკადემიის პ. მელიქიშვილის სახელობის ქიმიის ინსტიტუტში უფროსი მეცნიერი თანამშრომლის თანამდებობაზე; 1962 წელს აკადემიკოს ნ. შუიკინის ხელმძღვანელობით დაიცვა სადოქტორო დისერტაცია და ამავე წლიდან 25 წლის მანძილზე საქართველოს ტექნიკურ უნივერსიტეტში ხელმძღვანელობდა ორგანულ ნივთიერებათა ტექნოლოგიის კათედრას. მისი სამეცნიერო კვლევის ძირითადი მიმართულება იყო საქართველოს ნავთობის შესწავლა-გადამუშავება და მიღებული ნავთოპროდუქტების სახალხო მეურნეობის სხვადასხვა დარგში გამოყენება; მის მიერ აღმოჩენილმა ლუმინოფორმმა - "ნორიოლი" და "შუბეკოილი" საკავშირო მიღწევათა გამოფენაზე ოქროს და ვერცხლის მედლები დაიმსახურა; ამ ნაშრომებმა გამოხმაურება პოვა ინგლისში, იტალიაში, გერმანიაში; მისი ხელმძღვანელობით საქართველოს ნავთობიდან მიიღეს ქიმიური ბოჭკოს შემზეთავი "სპიოლი", რომელმაც წარმატებით გაიარა გამოცდა წარმოებაში; მისი გამოყენება დიდ ეკონომიკურ ეფექტთან არის დაკავშირებული. ქიმის მეცნიერებათა დოქტორი, პროფესორი.

წყარო: გამოჩენილი ინჟინრები და მეცნიერები: კრებული/შემდგ.: მიტროპოლიტი ანანია ჯაფარიძე [და სხვ.]. -თბ., 2012. -გვ.30-31

• საქართველოს მეცნიერებათა დამსახურებული მოღვაწე

• მეთოდური მითითებები ძირითადი ორგანული და ნავთობქიმიური სინთეზის ტექნოლოგიაში : ორგანულ ნივთიერებათა ტექნოლ. სპეც. დაუსწრ. და საღამოს სწავლების სტუდენტებისათვის (შემდგენელი). - თბილისი, საქ. პოლიტექ . ინ-ტის გამ-ბა, 1983. - 16გვ.
• კაპროლაქტამი და მისი წარმოების ტექნოლოგიური პროცესები (თანაავტორი). - თბილისი, საქართველოს პოლიტექნ. ინ-ტი, 1972. - 163გვ.
• პოლიმერები და მათი გამოყენება სახალხო მეურნეობაში (ავტორი). - თბილისი, საბჭ. საქართველო, 1964. - 28გვ.
• ფენოლის ჰიდრირება ბუნებრივი ალუმინსილიკატის თანაობის დროს (ავტორი). - თბილისი, 1963. - 6გვ.