გორდი ვერბეცკი

დაბადების ადგილი: ქ. კიევი.

დაამთავრა თბილისის რკინიგზის ტრანსპორტის ინჟინერთა ინსტიტუტის ხიდებისა და გვირაბების ფაკულტეტი 1947 წელს.

1947-1949წწ. მუშაობდა მდ. ტეხურაზე გადასასვლელი საავტომობილო ხიდის მშენებლობაზე სამუშაოთა მწარმოებლად; ამავე პერიოდში მუშაობდა ამიერკავკასიის მეტალურგიული ქარხნის მშენებლობის ცენტრალური ბეტონის ლაბორატორიაში; 1949-1951წწ. სწავლობდა თბილისის ნაგებობათა და ჰიდროენერგეტიკის სამეცნიერო-კვლევითი ინსტიტუტის ასპირანტურაში; ასპირანტურის დამთავრების შემდეგ მუშობა დაიწყო ამავე ინსტიტუტის რკინა-ბეტონის კონსტრუქციების ლაბორატორიაში უმცროს მეცნიერ-თანამშრომლად; 1954 წელს დაიცვა დისერტაცია ტექნიკის მეცნიერებათა კანდიდატის, ხოლო 1982 წელს - ტექნიკის მეცნიერებათა დოქტორის სამეცნიერო ხარისხის მოსაპოვებლად; 1962 წელს ენგურ-ჰესის საკვლევ პოლიგონზე დაბა ჯვართან, მისი ხელმძღვანელობით, შესრულდა მეტად მნიშვნელოვანი საველე-ექსპერიმენტული სამუშაო; 1969 წელს დაინიშნა ახლად შექმნილი ჰიდროტექნიკური ნაგებობების რკინა-ბეტონის კონსტრუქციების ხანგამძლეობის ლაბორატორიის გამგედ. მან გამოიკვლია ისეთი მნიშვნელოვანი საკითხები, როგორიცაა: ბზარების წარმოქმნა და მათი შემდგომი გახსნის კანონზომიერება ჰიდროტექნიკური ბეტონისა და რკინა-ბეტონის კონსტრუქციებში; ბზარების გახსნის ლიმიტირებული სიდიდეების დადგენა; ფილტრაციული მოვლენების განვითარება ბეტონისა და რკინა-ბეტონის ჰიდროტექნიკურ ნაგებობებში; ფილტრაციის დასაშვები სიდიდეების დადგენა; ჰიდროტექნიკური ბეტონისა და რკინა-ბეტონის ფიზიკურ-მექანიკური თვისებების გამოკვლევა და სხვ. მისმა შრომებმა პრაქტიკული გამოყენება პოვა კახოვკის (უკრაინა), გუმათის, ლაჯანურის, ჩირკეის (რუსეთი), ენგურის ჰესების მშენებლობისა და გამოკვლევების საქმეში; მას აქტიური მონაწილეობა აქვს მიღებული სანკტ-პეტერბურგის წყალდიდობისაგან დამცავი დამბის დაპროექტებასა და გამოკვლევაში; 1966-1985წწ. მონაწილეობდა სოციალისტური ქვეყნების ეკონომიკური ურთიერთდახმარების საბჭოს თემატიკის დამუშავებაში ჰიდროტექნიკური ნაგებობების ხაზით. გამოქვეყნებული აქვს 100-ზე მეტი სამეცნიერო ნაშრომი, მათ შორის, 2 მონოგრაფია; მრავალი სამეციერო სიმპოზიუმისა და კონფერენციის მონაწილეა. აღსანიშნავია მისი ნაყოფიერი პედაგოგიური და საზოგადოებრივი მოღვაწეობა; წლების განმავლობაში იყო მაღალი კაშხალების საერთაშორისო კომისიის სსრკ-ის ეროვნული კომიტეტისა და ჰიდროტექნიკური ნაგებობების გაანგარიშების საუწყებათაშორისო საკოორდინაციო კომიტეტის წევრი. საქართველოს ენერგეტიკისა და ენერგეტიკულ ნაგებობათა სამეცნიერო-კვლევითი ინსტიტუტის მთავარი მეცნიერ-თანამშრომელი, ტექნიკის მეცნიერებათა დოქტორი, პროფესორი.

წყარო: გამოჩენილი ინჟინრები და მეცნიერები: კრებული/შემდგ.: მიტროპოლიტი ანანია ჯაფარიძე [და სხვ.]. -თბ., 2012. -გვ.69-70; წიგნი ღირსებისა: ტ. 3/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.226

• 1998 - ღირსების ორდენი
  საქართველოში ენერგეტიკის განვითარებისათვის, აგრეთვე ნაყოფიერი სამეცნიერო პედაგოგიური და საზოგადოებრივი მოღვაწეობისათვის

• Бетон и железобетон в энергетическом строительстве : Материалы Всесоюз. конф. по бетону и железобетону, Казань, окт. 1988) (ავტორი). - Тбилиси, ГрузНИИЭГС, 1988. - 125с.