ნონა კალანდარიშვილი

დაბადების ადგილი: სოფელი კვირიკეთი, მახარაძის რაიონი (ახლანდელი ოზურგეთის მუნიციპალიტეტი).

დაამთავრა თბილისის სახელმწიფო უნივერსიტეტის აღმოსავლეთმცოდნეობის ფაკულტეტი სემიტოლოგიის სპეციალობით 1946 წელს.

უნივერსიტეტის დამთავრების შემდეგ რამდენიმე წელი კითხულობდა ლექციებს ბათუმის შოთა რუსთაველის სახელობის პედაგოგიურ ინსტიტუტში; 1951 წლის მარტიდან საუკუნის დასასრულამდე ის სხვადასხვა თანამდებობებზე მუშაობდა საბავშვო და ახალგაზრდობის ლიტერატურის გამომცემლობა "საბლიტგამში", შემდგომში "ნაკადულად" წოდებულში; ათეული წლების მანძილზე იყო ამ გამომცემლობის მთავარი რედაქტორი; ნ. კალანდარიშვილი იყო მრავალი წიგნის რედაქტორი, სტილისტი და მთარგმნელი; მას შესრულებული აქვს მხატვრული თარგმანები გერმანული და რუსული ენებიდან; ქართულად თარგმნილი აქვს კლასიკოსების თომას და ჰაინრიჰ მანების, შ. ცვაიგის, ლ. ფრანკის, ე. ჰოფმანის, ბ. კელერმანის, ძმები გრიმების და სხვათა თხზულებები; მის თარგმანებს დღესაც არ დაუკარგავთ გამომცემელთა და მკითხველთა ინტერესი; ავტორია მემუარების წიგნისა: "წლები და ადამიანები – მოსაგონარი "ნაკადულში" გატარებული ნახევარი საუკუნის შემდეგ", რომელიც ერთგვარი მატიანეა გამომცემლობისა და ის იქ გატარებულ წლებს, მის თანამშრომლებს და კოლეგებს ეძღვნება; მოგონებათა ფურცლებზე დიდი ადგილი აქვს დათმობილი ცნობილ ქართველ მწერლებს, მხატვრებს, პოლიგრაფისტებს, ქართული ინტელიგენციის სხვა წარმომადგენლებს, საზოგადოებისათვის მეტნაკლებად ცნობილ საგულისხმო ლიტერატურულ ფაქტებს. წიგნი წარმოადგენს საყურადღებო წყაროსა და მასალას მე-20 საუკუნის მეორე ნახევრის ქართული საგამომცემლო საქმისა და ქართული ლიტერატურის ისტორიისათვის. მისი ღვაწლი აღნიშნული იყო საპატიო სიგელებით.

• საქართველოს მწერალთა კავშირი, წევრი (1976-2004)

• 1968 - საქართველოს კულტურის დამსახურებული მუშაკი
  კულტურის დარგში ხანგრძლივი და დამსახურებული მუშაობისთვის

• გერმანული ზღაპრები : კრებული (მთარგმნელი). - თბილისი, პალიტრა L, 2020. - 320გვ.. - ISBN: 9789941295348
• მარიო და ჯადოქარი / თომას მანი : მოთხრობა (მთარგმნელი). - თბილისი, პალიტრა L, 2017. - 80გვ.. - ISBN: 978-9941-24-571-8
• ფანტასტიკური ღამე / შტეფან ცვაიგი : მოთხრობა (მთარგმნელი). - თბილისი, პალიტრა L, 2017. - 88გვ.. - ISBN: 978-9941-24-733-0
• ვერდი / ჯუზეპე ტაროცი : ბიოგრაფიული რომანი (მთარგმნელი). - თბილისი, ქართული ბიოგრაფიული ცენტრი, 2012. - 244გვ.. - ISBN: 978-9941-9239-4-4
• წლები და ადამიანები : მოსაგონარი "ნაკადულში" გატარებული ნახევარი საუკუნის შემდეგ (ავტორი). - თბილისი, უნივერსალი, 2012. - 82გვ.. - ISBN: 978-9941-17-644-9
• მარიამ სტიუარტი / შტეფან ცვაიგი : რომანი (მთარგმნელი). - თბილისი, პალიტრა L, 2011. - 392გვ.. - ISBN: 978-9941-422-81-2
• და-ძმა / ძმები გრიმები : ზღაპრების კრებული (მთარგმნელი). - თბილისი, ნაკადული, 1983. - 244გვ.
• მატილდა / ლეონჰარდ ფრანკი : რომანი (მთარგმნელი). - თბილისი, მერანი, 1975. - 352გვ.