იაგორ რუხვაძე

დაბადების ადგილი: ქ. თბილისი.

დაამთავრა საქართველოს ინდუსტრიული ინსტიტუტის ელექტროტექნიკური ფაკულტეტი 1936 წელს.

სამუშაოდ გაანაწილეს ქ. სევასტოპოლის ერთ-ერთ ქარხანაში; 1937 წელს მუშაობა დაიწყო საქართველოს ელექტრული სისტემის ცენტრალურ ლაბორატორიაში, სადაც გაიარა გზა რიგითი ინჟინრიდან მთავარ ინჟინრამდე. მოღვაწეობის ამ პერიოდში იგი ხელმძღვანელობდა საქართველოს ყველა მნიშვნელოვანი ობიექტის გაშვება-გაწყობით სამუშაოებს; მისი უშუალო მონაწილეობით საქართველოს ელექტროსადგურებზე დაინერგა ცნობილი მეცნიერის ლ. ცუკერნიკის მიერ გენერატორების კომპაუნდირების მეთოდი; შემდგომ წლებში იგი ხელმძღვანელობდა ხრამჰესი-1-ის გაშვების სამუშაოებს; 1948 წელს აქტიური მონაწილეობა მიიღო სოფლის მეურნეობის ელექტროფიკაციის საკავშირო კვლევითი ინსტიტუტის თბილისის ფილიალის დაფუძნებაში, რომელიც შემდგომში რეოგრგანიზებულ იქნა საქართველოს სოფლის მეურნეობის მექანიზაციის და ელექტროფიკაციის სამეცნიერო-კვლევით ინსტიტუტად; სიცოცხლის ბოლომდე მუშაობდა ამ ინსტიტუტის ელექტრული სადგურების და ქსელების განყოფილების გამგედ; მისი ხელმძღვანელობით, საბჭოთა კავშირში პირველად მოხდა ელექტრული სადგურის (ტირიფონ-ჰესის) სრული ავტომატიზაცია; დიდია მისი წვლილი "ორი სადენი-მიწა" ტიპის ელექტრული ქსელების თეორიის და პროექტირების საქმეში. ამ სფეროში მისი მრავალწლიანი შრომის შედეგები გახდა 1951 და 1953 წლებში გამოცემული "სოფლის მეურნეობის დანიშნულების "ოსმ" ქსელების პროექტირების სახელმძღვანელო მითითებების" საფუძველი; ეწეოდა აქტიურ პედაგოგიურ მოღვაწეობას საქართველოს პოლიტექნიკური ინსტიტუტის ელექტრული სადგურების, ქსელების და სისტემების კათედრაზე, კითხულობდა ლექციების კურსს "ელექტროსადგურების ელექტრული ნაწილი" და ხელმძღვანელობდა სადიპლომო გეგმარებას. 20-ზე მეტი სამეცნიერო შრომის ავტორია, რომლებიც გამოქვეყნებული იყო საკავშირო ჟურნალებში: "ელექტრული სადგურები", "ენერგეტიკა" და "სოფლის მეურნეობის მექანიზაცია და ელექტგროფიკაცია".

წყარო: გამოჩენილი ინჟინრები და მეცნიერები: კრებული/შემდგ.: მიტროპოლიტი ანანია ჯაფარიძე [და სხვ.]. -თბ., 2012. -გვ.123-124; საქართველოს ენერგეტიკოსები=Georgian Power Engineers: ენციკლოპედია.- თბილისი, 2016.- გვ.291

• შრომის წითელი დროშის ორდენი