
	English Georgian

ძიება

საქართველოს ბიოგრაფიულ ლექსიკონში იხილავთ იმ პიროვნებათა ბიოგრაფიებს, რომლებიც საქართველოს ისტორიის ნაწილნი არიან ან დაკავშირებულნი არიან საქართველოსთან, უცხოვრიათ საქართველოში ან მის ფარგლებს გარეთ.

ლექსიკონის მხარდამჭერია საქართველოს ეროვნული ბიბლიოთეკა.

პროექტი მიზნად ისახავს, გამოაქვეყნოს მაქსიმალურად ყველა ცნობილი ქართველი. ამ უნიკალური ლექსიკონის შევსებაში, ვფიქრობთ, ჩაერთვება მთელი საქართველო.

შემოგვიერთდით ფეისბუქის გვერდზე

ბიოგრაფიის შემოთავაზება

ჩასწორება

ელენე იოსელიანი

დაბადების თარიღი:	1870
გარდაცვ. თარიღი:	1942 (72 წლის ასაკში)
დაკრძალვის ადგილი:	სენ ჟენევიევ დე ბუას სასაფლაო, პარიზი
კატეგორია:	ჰუმანიტარი

ბიოგრაფია

პოდპოლკოვნიკ იასონ სოფრომის ძე იოსელიანის და სოფიო იოსების ასულ ფავლენიშვილის ქალიშვილს ელენე იოსელიანს კოტე აფხაზთან ქორწინებაში ჰყავდა ორი შვილი – ნიკოლოზი (დაიბადა 1899 წელს) და ილია (1901). უმცროსი შვილი ილია, სწორედ იმ დროს, როცა მამა-კოტე აფხაზი პირველი მსოფლიო ომის საბრძოლო ოპერაციებში იღებდა მონაწილეობას და საქართველოში არ იმყოფებოდა, 14 წლის ასაკში გარდაცვლილა. რაც შეეხება ნიკოლოზ (ნიკო) აფხაზს, მან 1918 წელს დაამთავრა თბილისის ქართული სათავადაზნაურო გიმნაზია, შემდეგ სწავლობდა კადეტთა კორპუსში და მსახურობდა ქართულ ჯარში. ნიკოლოზ აფხაზი 1921 წლის თებერვალში იბრძოდა ოკუპანტების წინააღმდეგ. აფხაზები თბილისში ბებუთოვის ქუჩაზე ცხოვრობდნენ (დღევანდელი ლადო ასათიანის 46). კოჯორ-ტაბახმელას ბრძოლების დროს ელენე აფხაზი სახლში იმყოფებოდა და ქმარ-შვილს გამარჯვებულებს ელოდა, თუმცა მოხდა ისე, რომ დედა-შვილი - ელენე და ნიკო საფრანგეთში ემიგრაციაში წავიდნენ, რაც შეეხება მამას კოტე აფხაზს, ის საქართველოში დარჩა და აგრძელებდა ბრძოლას დამპყრობლების წინააღმდეგ, რაც 1923 წლის მაისში მისი და კიდევ 14 ქართველი გმირის დღევანდელი ვაკის პარკის ტერიტორიაზე დახვრეტით დასრულდა. ამ ტრაგედიამ საფრანგეთში მყოფი კოტე აფხაზის ოჯახი საგონებელში ჩააგდო. ნიკო თავის და დედის გამოსაკვებად ძველ წიგნებს აგროვებდა და სენის ძველმანების ბაზრობაზე ყიდდა. გაჭირვების მიუხედავად, ნიკო აფხაზმა 1926 წელს პარიზში დაამთავრა სორბონის უნივერსიტეტის იურიდიული ფაკულტეტი და მიიღო დოქტორის ხარისხი. პარიზში ადვოკატად მუშაობდა, როცა გაიცნო მდიდარი ამერიკელი ცოლ-ქმარი, გვარად კელები და მათი შეთავაზებით, ნიკო და ელენე აფხაზები საცხოვრებლად გადავიდნენ მათ შატოში. საფრანგეთში ცხოვრების პერიოდში ელენე იოსელიანი-აფხაზი აქტიურად იყო ჩართული ჰუმანიტარულ საქმიანობაში, კერძოდ, ტუბერკულოზით დაავადებულებს ეხმარებოდა და უმწეოების მოვლით იყო დაკავებული. 1930–იანი წლების დამლევს ნიკოლოზ აფხაზი ოფიცრის წოდებით შევიდა სამხედრო სამსახურში, საფრანგეთის უცხოურ ლეგიონში. მეორე მსოფლიო ომის დროს იბრძოდა ჩრდილოეთ აფრიკაში, ალჟირსა და ლიბიაში. გამოჩენილი მამაცობისათვის დაჯილდოებული იყო საფრანგეთის რამდენიმე პრესტიჟული სამხედრო ჯილდოთი, მათ შორის საპატიო ლეგიონის ორდენით. ნიკო აფხაზი ერთ–ერთი ოპერაციის დროს ტყვედ ჩავარდა. მარტოდ დარჩენილმა დედამ ელენე იოსელიანმა შვილის ჰანოვერის საკონცენტრაციო ბანაკში ტყვეობა ვერ გადაიტანა და 1942 წელს გარდაიცვალა. ელენე აფხაზი დაკრძალეს პარიზის სენ ჟენევიევ დე ბუას (Cimetière Russe de Sainte Geneviève des Bois) სასაფლაოზე. კოტე აფხაზის მეუღლე და ნიკო აფხაზის დედა.

წყარო: facebook.com (Académie géorgienne-française ჟან შარდენის ქართულ-ფრანგული აკადემია)

გააზიარე: