არტემ კალანდია

დაბადების ადგილი: ქ. ზუგდიდი.
დაამთავრა სუბტროპიკული კულტურების საკავშირო ინსტიტუტი თბილისში 1932 წელს; საკავშირო მეცნიერებათა აკადემიის ქიმიის ინსტიტუტის ასპირანტურა 1938 წელს.

1939 წლიდან მუშაობდა მეცნიერებათა აკადემიის ქიმიის ინსტიტუტში უფროს მეცნიერ მუშაკად და შემდგომში იყო ამ ინსტიტუტის დირექტორის მოადგილე; ამავე წელს დაიცვა საკანდიდატო დისერტაცია ქიმიის დარგში; 1954-1972წწ. ჯანმრთელობის სამინისტროს სანიტარული-ქიმიის ლაბორატორიაში რადიო-ქიმიური განყოფილების გამგედ; 1972-1975წწ. იყო მოსკოვის ტექნოლოგიური ინსტიტუტის თბილისის ფილიალის დეკანი; ინსტიტუტის ლიკვიდაციის შემდეგ 1975 წლიდან საქართველოს პოლიტექნიკურ ინსტიტუტში ხელმძღვანელობდა რადიოქიმიურ პრობლემურ ლაბორატორიას; პოლიტექნიკურ ინსტიტუტში მუშაობის პერიოდში დაწერა სადოქტორო დისერტაცია რომელიც არ დაუცავს და ჩააბარა ინსტიტუტის ბიბლიოთეკას როგორც სახელმძღვანელო; ამის შემდეგ მას მიენიჭა პროფესორის წოდება; ის მუშაობდა ატომური ენერგიის და რადიაქტიული იზოტოპების სამშვიდობო მიზნების გამოყენებებისთვის, ამ დარგში მომუშავეთათვის გამოსცა წიგნი "რადიოქიმიისა და დოზიმეტრიის საფუძვლები", რომლის პირველი გამოცემა 1964 წელს გამოვიდა; მის კვლევებში დიდი ადგილი ეკავა ატომბირთვული ენერგიის და რადიაქტიული იზოტოპების გამოყენების პირობებში რადიაქტიული, ქიმიური და ბიოლოგიური გაჭუჭყიანებისაგან წყლისა და ჰაერის დაცვის პრობლემების შესწავლას; მან შეიმუშავა ფერადი მეტალურგიისა და ქიმიური ბოჭკოების წარმოების შედეგად გამოყოფილ აირებში ტოქსიკური ნივთიერებების შთანთქმისთვის ადსორბენტის მიღების მეთოდი, რომელიც იცავს ატმისფერულ ჰაერს მავნე აირებით გაჭუჭყიანებისაგან; არტემ კალანდია ხელმძღვანელობდა პოლიტექნიკური ინტიტუტის რადიოქიმიური კვლევის პრობლემურ ლაბორატორიას; იყო 80 მეცნიერული ნაშრომის, სამი სახელმძღვანელოს, ოთხი დამხმარე სახელმძღვანელოს და ოთხი მონოგრაფიის ავტორი.

• რადიოქიმიისა და დოზიმეტრიის საფუძვლები (ავტორი). - თბილისი, საბჭ. საქართველო, 1974. - 363გვ.
• რადიაქტიური, ქიმიური დაზვერვისა და დოზიმეტრიული კონტროლის ხელსაწყოები : სახელმძღვ. ზოგადსაგანმანათლებლო საშ. სკოლის მე-9 კლასისა და საშ. სპეც. სკოლებისათვის. ტექნიკუმებისა და პროფსასწავლებლებისათვის (ავტორი). - ცხინვალი, ირისთონი, 1971. - 132გვ.
• საბრძოლო მომწამლავი ნივთიერებანი, მათი ფიზიკურ-ქიმიურ-ფიზიოლოგიური თვისებანი, აღმოჩენა და გაუვნებლება (ავტორი). - თბილისი, ტექნიკა და შრომა, 1944. - 103გვ.
• ჰალოგენები : მასწავლებლის დასახმარებლად (ავტორი). - თბილისი, ინ-ტის გამ-ბა, 1940. - 72გვ.
• ჟანგვა აღდგენის საკითხისათვის : მასწავლებლის დასახმარებლად (ავტორი). - თბილისი, 1940. - 58გვ.